Johannes II. Komnenos

Us der alemannische Wikipedia, der freie Dialäkt-Enzyklopedy


Johannes II. (Byzanz)
Kaiser vom Byzantinische Riich
Johannes II. und Kaiserin Irene (Mosaik in dr Hagia Sophia)
Regierigsziit 15. August 1118 – 8. April 1143
Chrönig 1092 zum Mitkaiser
Uf d Wält cho 13. Septämber 1087
Geburtsort Konstantinopel
Gstorbe 8. April 1143 (im Alter vo 56)
Dodesort Kilikie
Vorgänger Alexios I.
Nochfolger Manuel I.
Verhürotet mit Irene vo Ungarn

Dr Johannes II. Komnenos (middelgriech. Ἰωάννης Β' Κομνηνός, * 13. Septämber 1087 z Konstantinopel; † 8. April 1143 im Taurus) isch dr byzantinisch Kaiser vo 1118 bis zu sim Dood gsi. Si Regierig isch samft und grächt gsi und dorum het men em dr byzantinisch Marcus Aurelius gsäit. Mit sim persönlige Vorbild het er d Sitte vo dr Zit verbesseret. Er het brobiert d Gröössi vom byzantinische Riich wider eso häärzstelle, wie si vor dr Katastrofe vo dr Schlacht vo Manzikert 1071 gsi isch (Restauratio imperii).

Häärkumft[ändere | Quälltäxt bearbeite]

Dr Johannes II. stammt us em Huus vo de Komnene, dr byzantinische Herrscherfamilie, wo lenger as alli andere regiert het. Er isch dr eltisti Soon vom Kaiser Alexios I. mit siner Frau Irene Dukaina gsi und isch au bekannt as Kaloioannes (dr schööni Johannes).

Lääbe[ändere | Quälltäxt bearbeite]

Im Johannes si Schwöster, d Anna Komnena, get welle, ass iire Maa, dr Nikephoros Bryennios, Käiser wurd, aber dr Johannes het sich chönne duuresetze.

Er het 1122 d Petschenege gschlaage, wo si in s Riich iigfalle si und die Gfoor für immer uf d Site gschafft. Sini Siig über d Ungare und die ufständische Serbe häi dr Friide im öiropäische Däil vom byzantinische Riich gsicheret, und er het sich denn chönne draamache, die verloorene Gebiet in Asie zruggzeroobere. Er het Erfolg ghaa gege d Seldschuke (1135) und het deren iiri Fortschritt aaghalte. In Sürie het er aber gege d Araber nüt usgrichdet. Wil d Normanne under iirem Köönig Roger II. in Sizilie iiri Macht usbaut häi, het dr Johannes mit de dütsche Köönig Lothar III. und Konrad III. dr Verdraag vo Thessaloniki abgschlosse.

D Republik Venedig het sich aber iim gegenüber chönne duuresetze. Sit em 11. Joorhundert het Byzanz käi nennenswärti Marine me gha uns isch vo dr Seemacht vo de Venezier abhängig gsi. Wo dr Johannes brobiert het d Briwilegie wo d Venezier in sim Riich ghaa häi, z beschniide, häi die e baar byzantinischi Haafestedt blünderet und dr Johannes het müesse chlii biigee. Si Finanzpolitik isch aber eender erfolgriich gsi.

Dr Johannes het sich uf ere Jagd im Taurus verletzt und isch an ere Bluetvergifdig gstorbe. Er het aber no Ornig in dr Noochfolg chönne mache und si vierte Soon, dr Manuel I. Komnenos als Kaiser iigsetzt.

Weblingg[ändere | Quälltäxt bearbeite]


Dä Artikel basiert uff ere fräie Übersetzig vum Artikel „Johannes_II._(Byzanz)“ vu de dütsche Wikipedia. E Liste vu de Autore un Versione isch do z finde.