Johannes (XXIII.)
De Johannes (XXIII.) (* öppe 1370 z Neapel; † 22. Dezember 1419 z Florenz) isch vo 1410 bis 1415 de 23. Papscht gsi, wo sich de Name Johannes gäh het. Sin bürgerlicher Name isch Baldassare Cossa gsi. Hüt wird er vo de katholische Chile in de offizielle Papaschtlischte nöd ufgführt, wil de Johannes XXIII. durch sini Nameswahl endgültig in d Reihe vo de Gägepäpscht iigordnet het. Vorher isch es in de katholische Chilegschichtsschriibig umschtritte gsi, ob de Johannes en rächtmässige oder en schismatische Papscht isch gsi.
Sis Läbe [ändere]
De Baldassare Cossa isch us eme neapolitanische Gschlecht. Zerscht isch er Offizier worde und spöter Kardinal. Zu dere Ziit isch er noch Laie gsi und het erscht spöter sini Weihe übercho. In de Ziit vom Abendländische Schisma isch er z erscht uf de Site vo de Päpscht z Rom gsi, het sich aber ab em 1408i für Konzilslösig iigsetzt. Bim Konzil vo Pisa isch dann de Alexander (V.) gwählt worde und me het di Päpscht vo Rom und Avignon für abgestzt erklärt, wo des aber nöd akzeptiirt hei. So het's sogar drü Päpscht gä. Wo de Alexander dann am 3. Mai 1410 gschtorbe-n-isch, isch de Baldassare Cossa zu sim Nachfolger gwählt worde und het de Name Johannes XXIII. aagnoh. Im Konzil vo Konschtanz, wo sich de Johannes e Bestätigung vo sim Papschttum erhofft gha het, isch er unter Druck cho abzträte und isch im März 1415 mit Unterstützig vom Herzog Friedrich IV., eme Habsburger us Koschtanz gflüchtet, isch abe rim April z Freiburg im Breisgau verhaftet worde. S Konzil het dann am 6. April 1415 s Dekret Haec sancta verabschiidet, wo d Oberhoheit von Konzil über de Papscht postuliirt het. De Johannes isch vom Konzil für abgsetzt erklärt worde. In dere Ziit isch er z Heidelberg im Schloss iigschperrt gsi und er het sini Absetzig akzeptiirt. Im Frühjohr 1419 isch er us de Haft entlaa worde und isch im Dezember vom gliiche Johr z Florenz gschtorbe.
