Internationaler Tag der Muttersprache

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Dr 21. Februar isch 1999 vo dr UNESCO zum Internationale Muettersproch-Dag (franz. Journée internationale de la langue maternelle äng. International Mother Language Day) erklärt worre. Dr Zweck vum Gedänkdag isch sprochlichi un kultureli Viilfalt un Mehrsprochigkeit vürschi z bringe, mitem Hintergrund dass über d Hälfti vo de über 6.000 Sproche vo dr Wält uf langi Sicht vum Usstärbe bedroht sin.

Jeds Johr am 21. Februar wird vo dr UNESCO dr Linguapax Prys vergebe. 2006 isch dr Prys aa d Natividad Mutumbajoy, e Ingano-Indianeri us Kolumbie gange, wo sich mitenere Schüel für d Erhaltig vo dr Sproch vo ihrem Volch starch gmacht het. S Thema 2007 isch Mehrsprochigkeit gsi. 2007 isch dr Prys aa d Maya Khemlani David us Malaysia gange, wo syt Joore de Sprochwäggsel unter de sprochliche Minderheite vo Malaysia untersuecht.

Denkmahl z Bangladesch für d Doti im Champf um s Sprochrächt für s Bengali

Hintergrund[ändere | Quälltäxt bearbeite]

Dr Gedänkdag goot uf Unruhe z Oscht-Pakistan (hüt Bangladesch) im Johr 1952 zrugg. D Regierig vo Pakistan het sich doomools entschlosse Urdu zur alleinige Amtssproch z ernenne, e Sproch wo numme vunere winzigi Minderheit gsproche worre isch. Z Oschtpakistan, wo d Mehrheit vo dr Bevölchrig gläbt het, isch vorallem Bengali gsproche worre. Dr Governeur vo Pakistan, dr Khawaja Nazimuddin, het erklärt: "Urdu un numme Urdu wird d Amtssproch vo Pakistan sy". Binere Demonschtration drgäge het d Polizei am 21. Februar mehreri Mänsche erschosse.

D Regierig het druf yglenkt un Bengali het glychi Rächt als Amtssproch erhalte. D Sprochbewegig het d Spannigi zwüsche Oscht- un Weschtpakistan wyter aagheizt un het 1971 zur Unabhängig vo Bangladesch gfüert.

Weblink[ändere | Quälltäxt bearbeite]