Engadin Skimarathon
De Engadin Skimarathon isch mit Abstand di grösti Langlaufverastaltig i de Schwiz und werd jewils am zwote Sunntig vom März im Oberengadin mit öpe 11'000 bis 13'000 Läuferinne und Läufer dore gfüert.
Strecki [ändere]
D Längi vom Ränne, wo im freie Stil ustreit werd, isch rund 42 Kilometer. De Streckerekord isch im Johr 1994 bi de Manne vom Hervé Balland mit 1 Stund 16 Minute und 10 Sekunde, und bi de Fraue vo de Silvia Honegger mit 1 Stund 22 Minute und 8 Sekunde im gliiche Johr ufgstellt worde. Dor d Verlegig vom Ziil vo Zuoz noch S-chanf im Johr 1998 und ere neue Streckefüerig im Stazerwald bi Pontresina im Johr 2004 händ sich Zyte vo de schnällste Läufer bim Marathon erhöht.
De Start isch bi Maloja uf ere Höchi vo 1'820 m ü.M. Wänn d Seeä im Oberengadin nöd gfroore sind, dänn werd de Start uf Sankt Moritz Bad verschobe oder de Marathon werd abgseit, wie im Johr 1991. D Strecki goht zerscht über de Silsersee und de Silvaplanersee. Noch St. Moritz Bad häts dor de Stazerwald e chlinni Stiigig und nochhär wider e Gfäll i Richtig Pontresina, wo för vili Läufer e Gfoor för en möglicha Sturz isch. Noch de Talstazion vo de Bahn uf Muottas Muragl verlauft d Strecki em Flughafe vo Samade und em Inn entlang über La Punt-Chamues-ch und Zuoz bis noch S-chanf, wo s Ziil uf ere Höchi vo 1'670 m ü.M. isch.
Rangliste [ändere]
Vom erstemol im Johr 1969, wos e Rangliste bim Marathon git, bis is Johr 1980 händ bi de Manne immer Schwizer gwunne.
Di Erst-Platzierte vo de letschte Johr:
| Rangliste | ||||
|---|---|---|---|---|
| Johr | Manne | Zyt | Fraue | Zyt |
| 2012 | Roman Furger (SUI) | 1:31:21 h | Anouk Faivre (FRA) | 1:36:28 h |
| 2011 | Remo Fischer (SUI) | 1:39:51 h | Antonella Confortola Wyatt (ITA) | 1:48:00 h |
| 2010 | Dario Cologna (SUI) | 1:36:58 h | Susanne Nyström (SWE) | 1:43:02 h |
| 2009 | Fabio Santus (ITA) | 1:38:37 h | Seraina Mischol (SUI) | 1:43:32 h |
| 2008 | Tor Arne Hetland (NOR) | 1:24:30 h | Katrin Zeller (GER) | 1:33:27 h |
| 2007 | Dario Cologna (SUI) | 1:43:44 h | Laurence Rochat (SUI) | 1:50:33 h |
| 2006 | Mikhail Botwinov (AUT) | 1:55:51 h | Natascia Leonardi Cortesi (SUI) | 2:01:22 h |
| 2005 | Gion Andrea Bundi (SUI) | 1:34:01 h | Natascia Leonardi Cortesi (SUI) | 1:40:19 h |
Lueg au [ändere]
Allmänd (Commons): Engadin Skimarathon – Sammlig vo witere Multimediadateie- Engadin Skimarathon offizielli Internetsiite
- Streckeplan vo de Wettkampfsite
