Alphons Pfyffer

Dr Alphons Pfyffer vo Heidegg, (* 5. September 1753 z Luzärn; † 11. April 1822 z Luzärn) isch e Schwiizer Politiker zur Ziit vo dr Helvetik gsi.

Dr Pfyffer vo Heidegg isch 1753 als Sohn vom Josef Ignaz Xaver Pfyffer vo Heidegg und dr Maria Jakobea gebooreni Balthasar uf d Wält cho. Dr Pfyffer het zum Leodegarische Zwiig vo de Luzärner Pfyffer ghört, wo sich au Pfyffer vo Heidegg gnennt hai.

Er het zerst e militärischi Karriere gmacht und isch e ziitlang z Paris gsi as Lütnant vo dr Schwizergarde. Won er noch Luzärn zrugg cho isch, het er revolutionäri Ideä afo verbreite.

1783-89 isch er Stadtschriiber z Willisau gsi, 1789-98 Stadtschriiber z Luzern. Vo 1774 bis 1790 und wider 1807-14 isch er Luzerner Grossrat gsi, 1778-80 Vogt im Maggiatal.

Noch dr Helvetische Revolution im Früehlig 1798 isch dr Pfyffer as e gemässigte Reformer vo de Republikaner am 18. April ins erste Direktorium vo dr Helvetische Republik gwehlt worde. Uf Druck vom französische Gsandte Jean-Jacques Rapinat het dr Pfyffer aber scho am 18. Juni vom gliiche Johr wider müesse zruggdrätte. Er isch Mitgliid vom helvetische Senat und vom Grosse Root bliibe, won er zu de Unitarier zehlt het.

1805-22 isch er Übersetzer vo dr Staatskanzlei gsi, 1814-22 au Kantonsfürsprech im Amt Luzern.

Anne 1788 het er d Elisabeth Dula ghirote.

Literatur

Markus Lischer: Pfyffer, Alphons (von Heidegg). In: Historisches Lexikon vo dr Schwiiz.
Franz Joseph Schiffmann: Pfyffer von Heidegg, Alphons. In: Allgemeine Deutsche Biographie (ADB). Band 25, Duncker & Humblot, Leipzig 1887, S. 716 f.

Dä Artikel basiert uff ere fräie Übersetzig vu dere Version vum Artikel „Alphons_Pfyffer“ vu de dütsche Wikipedia. E Liste vu de Autore un Versione isch do z finde.