30. Februar

Historischi Johresdäg Januar · Februar · März

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 (30)

Dr Moonet Februar het im juliaanische und im gregoriaanische Kaländer nume 28 Dääg und in Schaltjoor 29. Wo Schweede vom juliaanische zum gregorianische Kaländer in dr Kaländerreform 1712 umgschaltet het, het s e 30. Februar gee. Es git verschidnigi Kaländerentwürf, wo dr Februar 30 oder mee Dääg het, wo aber nid umgstzt worde si.

Dr 30. Februar z Schweede

Site us em schweedische Kaländer für s Joor 1712 – rächts unde gseet mä dr 30. Februar

Am Aafang vom Joor 1700 het Schweede beschlosse, vom juliaanische zum gregoriaanische Kaländer z wäggsle. Die ursprüngligi Idee isch gsi, ass mä vom Joor 1700 aa bis zum Joor 1740 uf im Ganze elf Schaltjoot wurd verzichde und eso nodinoo dr Underschiid zwüschen em alte und em nöije Kaländer wurd usgliiche. Das hätt zwar d Umstellig im Land sälber äifacher gmacht, d Beziejige zu allen andere Staate weere aber komplizierter worde, wil Schweede denn 40 Joor lang mit käim andere Staat dr gliich Kaländer gha hätt und dr kaländaarisch Underschiid zum Räst vo Öiropa sich alli vier Joor gänderet hätti. Im Joor 1700 het mä mit dr Reform aagfange und dr 29. Februar übersprunge. Denn isch aber dr Grooss Nordisch Chrieg (1700 bis 1721) usbroche, wo mä d Blään uf Iis gläit het. Im Januar 1711 het dr Köönig Karl XII. beschlosse zrugg zum juliaanische Kaländer zgoo. Jetz isch Schweede aber e Daag vorus gsi und zum das uszgliiche het mä 1712 e zwäite Schaltdaag, dr 30. Februar iigschaltet. Das het au für Finnland gulte, wo dennzumol vo Schweede abhängig gsi isch, nit aber in de schweedische Browinze z Dütschland, wo mit de üübrige protestantische Gebiet vo Dütschland scho 1700 dr gregoriaanisch Kaländer iigfüert häi. 1753 het Schweeden denn aber dr gregoriaanisch Kaländer doch no iigfüert.

Weblingg

 Commons: 30. Februar – Sammlig vo Multimediadateie

• Der 30. Februar 1712 (Memento vom 11. Februar 2012 im Internet Archive) (änglisch)
• 30 Tage im Februar (Memento vom 3. März 2012 im Internet Archive) (änglisch)
• Kalenderumstellung in Schweden (Memento vom 10. Mai 2015 im Internet Archive) (änglisch)
• Geschichte des russischen Kalenders (Memento vom 12. Juli 2012 im Webarchiv archive.is)