Ägäischer Vulkanbogen

Us der alemannische Wikipedia, der freie Dialäkt-Enzyklopedy
Hops zue: Navigation, Suech
de Vulkankrater vo Nisyros
d Vulkaninsle Nea Kameni / Santorini

De Ägäischi Vulkanboge oder au Hellenische Vulkanboge oder Kykladeboge isch e Chetti vo merere vulkanisch aktive Zone i de Ägäis. Em bikanntiste devo isch de aktivi Vulkan vo Santorini.

Uusdeenig[ändere | Quälltäxt bearbeite]

Zum Vulkanboge ghöred vo Ost geg West d Insle Nisyros, Gyali, Kos, Santorini mit em Kolumbo, Melos mit Antimelos, Kimolos und Polinos, denn Antiparos und a de Nordchüste vo de Argolis Methana und Isthmos mit de Insle Ägina, i de griechische Landschaft Phthiotis Hagios Ioannis, uf de Insle Euboia Lichades und am Golf vo Iolkos Achilleion, Zileria und Porphyrion.

Vo dene sind hüt di maiste nume schwach vulkanisch aktiv, erchennbar dör Fumarole, haissi Quelle oder Schwefelwasserstoffgas. Historisch aktivi Vulkän sind Methana, Nisyros und Santorini. Methana isch früener en Insle im Saronische Golf gsii und isch hüt mit em Peloponnes zämegwachse. De letscht Uusbruch isch ane 250 v.Chr. biobachtet wore. Nisyros, e chliis Inseli südlich vo Kos isch im 19. Joorhundert bsunders aktiv gsii (1830, 1871, 1873, 1888) und de bsunders aktivi Vulkan vo Santorini isch s letschtmol im Jäner 1959 uusbroche.

Ursach[ändere | Quälltäxt bearbeite]

Di Ägäische Insle bildet zäme mit Südgriecheland und em westliche Chliiasie di Ägäischi Platte, wo vo de Eurasische Platte und de Anatolische Platte wiene Kail geg Südweste tribe werd. Di Afrikanischi Platte schiebt sich dodebi im Joor öppe zwee Santimeter under di Ägäischi Platte. Da füert dezue ass uf Kreta und uf em Peloponnes bsunders heftigi Erdbebe vorchömed. Dai wo die Afrikanischi Platte zwöschet 120 und 180 Kilometer under de Erdbobeflächi isch, bildet sich Magmaherd wo denn as Vulkän a d Erdoberflächi trete chönd.