Zenobia
D Septimia Zenobia, wo öppe anne 240 z Palmyra uf d Wält cho und öppe anne 273 z Rom gstorben isch, isch e Zyt lang d Königin vo Palmyra gsi und het au es paar Joor lang über s Land vo Anatolie bis uf Ägüpte regiert. Drum isch si eini vo de bekantischte Fraue vo dr Antike, und bi de alte Gschichtschryber wird iri Gschicht beschribe.
Ire Maa isch dr Septimius Odaenathus gsi. Si het en öppe anne 255 ghürootet. Em Odaenathus sini Uufgab isch es gsi, mit sim eigene Land innerhalb vom Römische Rych däm sini Oschtsyte z bewache.
Wo dr Septimius Odaenathus anne 267 umprocht worden isch, wäär däm und dr Zenobia ire chly Soon Vaballathus dr nöi Herrscher vo Palmyra worde; do het sini Muetter Zenobia für iin s Szepter übernoo. Si het ires Rych starch vergrösseret; under dr Herrschaft vo Palmyra sind gly ganz Arabie und Ägypte gsy. Die römische Kaiser Gallienus und Claudius Gothicus händ z Europa wäge vilne Komflikt alli Händ voll z tue gha und sind nit uf Syrie ggange.
Eerscht dr Kaiser Aurelian isch anne 272 mit dr römischen Armee in Nochi Oschte cho und het mit emene Chrieg der eigemächtige Herrschaft vo dr Zenobia es Änd gmacht. D Königin het uf Persie welle flüchte, isch aber i dr syrische Wüeschti vo de Röömer gfange gnoo worde. Wo me se uf Rom brocht het, isch si ums Läbe cho.
Literatur[ändere | Quälltäxt bearbeite]
- Nathanael J. Andrade: Zenobia. Shooting Star of Palmyra. New York 2018, ISBN 978-0-19-063881-8.
- Tadeusz Kotula: Aurélien et Zénobie. L’unité ou la division de l’Empire? Wrocław 1997, ISBN 83-229-1638-8.
- Eugenia Equini Schneider: Septimia Zenobia Sebaste. Rom 1993, ISBN 88-7062-812-4.
- Pat Southern: Empress Zenobia: Palmyra's Rebel Queen. Continuum, London/New York 2008 (populärwissenschaftlicher Überblick).
- Anja Wieber: Die Augusta aus der Wüste – die palmyrenische Herrscherin Zenobia. In: Thomas Späth, Beate Wagner-Hasel (Hrsg.): Frauenwelten in der Antike. Geschlechterordnung und weibliche Lebenspraxis. Stuttgart 2006, ISBN 3-476-02175-0, S. 281–310.
- Rex Winsbury: Zenobia of Palmyra: history, myth and the neo-classical imagination. London 2010, ISBN 978-0-7156-3853-8.
- Yasamin Zahran: Zenobia between reality and legend. Oxford 2003, ISBN 1-84171-537-9.
Weblink[ändere | Quälltäxt bearbeite]
Commons: Zenobia – Album mit Multimediadateie