Zürcher Kantonalbank

Dialäkt: Züritüütsch

Zürcher Kantonalbank (ZKB)
Unternähmensform	Öffentlich-rächtlichi Aastalt
Gründig	15. Februar 1870
Sitz	Züri, Schwiiz
Leitig	Urs Baumann (CEO) Jörg Müller-Ganz (Bankpräsident)
Mitarbeiter	6655 (31.12.2025)
Bilanzsumme	206 Mrd. sFr. (31.12.2025)
Branche	Banke
Produkt	Finanzdienstleistige
Uffdritt im Netz	www.zkb.ch

D Zürcher Kantonalbank (abgchürzt ZKB) isch di kantonal Volchsbank im Kanton Züri. Si isch en Universalbank, isch aso i allne Bankgschäft aktiv und schaffed mit allne Chundegruppe zäme.

Volchsbank

D ZKB hät am 15. Februar 1870 iren eerscht Schalter uufgmacht. De Grund hät d Kantonsverfassig vo 1869 gläit, wo e Bank hät wele, wo s Kreditwäse im Kanton Züri förderet; im Artikel 24 ghäissts deet: «Er [das isch de Staat] errichtet zur Hebung des allgemeinen Kreditwesens beförderlich eine Kantonalbank.» So ghöört d ZKB sit 1870 zu 100 Prozänt em Staat, understaat aber nöd em Regierigsraat, sondern tiräkt am Kantonsraat. Dää wäält de Bankraat als Uufsichtsorgan. D Bank gnüüsst en unbigränzti Staatsgaranty.

Bidüütig und Kännzaale

D ZKB isch di viertgrööscht Bank in de Schwyz und isch 2013 vo de Schwyzerische Nationalbank as «sischteemrelevant» ygstuuft woorde.

D Kännzaale per Ändi 2025 sind die:

• Bruttogwünn vom Konzärn: 1354 Mio. Franke
• Jaaresgwünn vom Konzärn: 1422 Mio. Franke
• Gwünnuusschüttig an Kanton und a d Gmäinde: 581 Mio. Franke
• Bilanzsume: 206 117 Mio. Franke
• Äigni Mittel: 15 727 Mio. Franke
• Chundevermöge: 498 598 Mio. Franke
• Mitarbäiter (täilzytbiräiniget per Ändi Jaar): 5 809

D ZKB hät per Ändi 2025 51 Filiaale und ein Räie wyteri Ort mit Bancomat. Na vor nöd eso lang sinds 103 Gschäftsstele gsy (daadevo 83 Filiale, 16 Agenture und 4 Automatebanke).

Engagement

As Zürcher Volchsbank understützt d ZKB ganz vil kulturelli, soziali und wirtschaftlichi Undernämige.

Si isch e Hauptsponsorin vom Züri-Zoo, vom Wildnispark Züri, vom Schauspilhuus Züri, vom Musigkolegium Winterthur, vom Theater Kanton Züri, vom Casinotheater Winterthur, vom Zürcher Theaterspektakel, vom Zürcher Chammerorcheschter, vom Fäschtival jazznojazz, vom Jazzclub Moods und vom Veräin Zürcher Wanderwääg. Si richt de ZKB Schillerprys uus und hät d Stiftige Botanische Gaarte Grüenige und SanArena-Rettigsschuel ggründet. Si zalt au an Züri-Marathon, a d Töss-Stafette und an Zürcher Turnverband ane. Dezue ane understützt si s Nachtnetz vom Zürcher Vercheersverbund.

De Wirtschaft und de Kultur hilft si mit verschidene Prys, öppen em ZKB KMU-Prys, em KB Naachhaltigkäitsprys für Bruefsschuelen, (zäme mit em Technopark) em ZKB Pionierprys, em Runway Startup Incubator und em Förderprys Theaterspektakel. A der Universität Züri understützt si as Mitgründeri vo de Stiftig «Excellence Foundation Zurich» d Forschig i verschidene Biräich, a der ETH Züri förderet sie s Zurich Information and Security Center (ZISC) und s ETH AI Center, a de ZHdK isch si Gründigspartneri vom Zurich Center for Creative Economies (ZCCE) und a de PHZH unterstützt si as Gründungspartneri der Uufbou vom Labs Zukunft der Berufsbildung. Dezue ane förderet si Jungundernäme.

2018 hät si für all die Sache zämezellt 140 Milioone Franken uusggëë.

Kritik am Rächtsgwand

S Rächtsgwand vo de Zürcher Kantonalbank isch alewyl na esoo glismet, as wäär si e lokali Bank für de chly Chund. Das isch aber lengscht nüme de Realitäät: D ZKB isch äini von grööschte Schwyzer Banke und isch europawyt presänt. Dezue ane chunt, dass si na zu dene Kantonalbanke ghöört, wo e volli Staatsgaranty händ, das ghäisst: Wänn si is Gwaggle chunt oder ganz zämebricht, mues de Kanton Züri jedem äinzelne, wo uf de ZKB Gält (gha) hät, ales bi uf de letscht Rappe us Stüürgälder wider zruggzale. Liberali Politiker wetted d Rächtsgrundlaag drum modernisiere, aber di lingge und di rächte Parteie sind degäge, wil si nach em hüttige Sischteem im Kantonsraat chönd über d ZKB mitbestime, und die Macht wänd s nöd uufgää.

Literatur

• Tobias Straumann, Gerda Leipold, Matthias Wiesmann und Raphaela Ziegler: 1870–2020 (Digitalisat Inhaltsverzeichnis PDF), Zürich: Zürcher Kantonalbank 2020, ISBN 978-3-280-06018-6.
• André Müller: Frei durch die Kantonalbank, «auch wenn diese nur 1000 Bürger aus den Händen der Kapitalisten rettet». In: Neue Zürcher Zeitung. 13. Februar 2020. Abgrüeft am 26. Juni 2022.

Weblink

• Zürcher Kantonalbank