Y-Chromosom

S Y-Chromosom isch e Gschlächtschromosom (Gonosom) bi gwüsse Dierarte, drunder bim Mensch. Es bewirkt, ass sich dr männlig Fenotüp usbildet.

Bi vile Arte wird s Gschlächt vom ene Indiwiduum dur e chromosomali Gschlächtsbestimmig festgläit. Wenn in wiiblige Indiwidue zweimol s gliiche Chromosom (homozygot; XX) und in männlige zwäi underschidligi Chromosom (hemizygot; XY) vorchömme, schwätzt mä per Definizion vo X-Chromosome und Y-Chromosome.

S XX/XY-Süstem vo dr Gschlächtsdeterminazion het sich in verschiidene Diergrubbe unabhängig vonenander entwigglet. Es chunnt bi Süüger, gwüsse Insektenarte und non e baar andere Diergrubbe vor (lueg Gschlächtschromosom).

Es git aber Lääbewääse wie zum Bischbil d Vögel, wo die männlige Indiwidue zwäi gliichi Chromosome, Z-Chromosome, häi und die wiiblige je äi W- und äi Z-Chromosom.

Weblingg

The Y Chromosome Consortium (YCC) (änglisch)
Human Y Chromosome information (Oak Ridge National Laboratory) (änglisch)

Dä Artikel basiert uff ere fräie Übersetzig vum Artikel „Y-Chromosom“ vu de dütsche Wikipedia. E Liste vu de Autore un Versione isch do z finde.