Wimmelbuach

Als oiner vo de Vorlaifer vo de Wimmelbiacher geldet em Pieter Brueghel d. Ä. seine Bilder, wia dô uff seim Gemälde Die niederländischen Sprichwörter

Dialäkt: Schwäbisch

A Wimmelbuach ischt a Bilderbuach fir Kender, wo ogfähr em Alder zwischa zwoi ond fenf Jôhr send.

A nähera Beschreibong vo-ma Wimmelbuach

Dia Wimmelbiacher zeichnet sich dôdurch aus, dass dia Bilder en deam Buach voll send vo Leit, Viicher ond Sacha, dô wemmlet’s also noch ond necher vo Kleinichkeida. Meischdens vorzichdet d Autora vo deane Biacher ganz uff da Tekscht, ond wenn ausnahmsweis amôl dr Tekscht et fehla derf, nô ischt’r zemlich kurz. S Format kô saumäßich grauß sei (so bis zo DIN A 2) oder arg kloi (zom Beischbiil 10 môl 10 Zendemetr). D Bledder send us-ma stabila Babbadeckl, damit-se et glei nôch de erschda baarmôl Druchbleddra an Riss kriaga kennet.

Pädagogischer Nutza

Jedes Buach ischt a-ma beschdimmda Thema gwidmet odr vorzehlt a durchgängigs Gschichtle, manchmôl trifft au boides zua. A baar Beischbiil:

• Frühling, Sommer, Herbst und Winter vom Ali Migutsch
• Weihnachten in der Wimmelwelt vom Joachim Krause
• Stuttgart wimmelt vo dr Tina Krehan
• DUDEN – Das Wimmel-Wörterbuch
• Stefan Seidel: Das große AUTO-WIMMELBUCH

So lernet de kloine Kender ihr Umwelt besser kenna ond entwicklet a Vorstendnis fir d Nadur. Au d Freid an de Biacher wuud gweckt. Drzua kommt noh, dass dia Kender oft kloine Uffgaba leesa sollet, zerscht mit Hilf vo-ma Erwachsena ond schbäder alloi. Als Beischbiil dô drfir wuud s Buach Stuttgart wimmelt ranzoga:

Des Buach vorzehlt a kloina Gschicht, wo uff-em hendra Buachdeckl stôht: S gôht om a Stuegerder Familie – Vadder, Mueder ond s Kend Tom. Dia drei kriaget Bsuech vom Tom seine Großeltra. Zamma erkondet-se z Stuegert

• da Hauptbôhhof,
• da Schlossplatz,
• da Zoologischa ond Bodanischa Garda “Wilhelma”,
• da Mariaplatz,
• da Flughafa,
• s Cannschdadder Volksfescht,
• da Flughafa ond
• da Stuegerter Fernsehdurm.

Uff jedem Bild fendet mr bei-ma gnaua Nôgucka da Hond Theo, da Ausreißer-Pabagei Rufus ond da jonga Kerle Leo, wo emmer da Nama vo sellem Mädle Lea, wo-nr ganz arg môôg, irgendwo nôschbriaht. Manchmôl isch dui Suacherei oifach ond manchmôl au schwer.

Bekannde Autora

Als Vadder vo de Wimmelbiacher gilt dr Ali Migutsch (1935–2022), wo 1968 sei erschts Buach en dera Art rausbrôcht hôt.. Seine Vorbilder zo soddiche Biacher send wahrscheinlich d Gemälde vo so alde hollendische Renaissance-Moischder wia dr Hieronymus Bosch (1450 bis 1516) ond dr Pieter Brueghel d. Ä. (1525 bis 1569) gwäa, wo’s uff de selle ihre Kunschtwerk au noh so vo Menscha ond Sacha wemmlet. Weidre Geschdalder vo Wimmelbiacher send zom Beischbil d Rottraut S. Berner, dr Martin Handford, dr Guido Wandrey, dr Joachim Krause, dr Ralf Butschkow ond dr Stephan Lomp

Litratuur

• Cornelia Rémi: Wimmelbooks. In: Bettina Kümmerling-Meibauer (Hrsg.): Routledge Companion to Picturebooks, London, New York: Routledge, 2017, S. 158-168. ISBN 978-1-138-85318-8
• Cornelia Rémi: Reading as Playing: The Cognitive Challenge of the Wimmelbook. In: Bettina Kümmerling-Meibauer (ed.): Emergent Literacy: Children's Books from 0 to 3, Amsterdam: John Benjamins, 2011 (Studies in Written Language and Literacy 13), S. 115-139. ISBN 90-272-1808-0

Weblink

• An Haufa Wimmelbilder aus vorschiidene Biacher
• A Beitrag zo de Wimmelbiacher ihrem Nutza, ibr Thema, Autora ond Herkunft bei wimmelbild-buecher.de