Wikipedia Diskussion:WikiHeftli

Weiß öbber öbbis vùm Manuel ghöört, gìt's no e Chance, dass mr die Wikiheftlì emoll chönne usebringe, finanziäll gseh? Èr hät devùù gschwätzt, dass er Gäld jederzitt bschaffe chönnt, d'Diskùssion isch deno abber wìder iigschlofe [1]. Häsch duu, Holder, züefällig mìt em drǜber gschwätzt, wùù de en droffe häsch, isch des no aktuäll? Sunscht deet i en emoll aaschribe ùn froge. --Strommops ð 21:02, 25. Dez. 2009 (MEZ)[Antwort gee]

Beaatrooge cha mer des warschynts scho wemmer es cha begründe. Aber mer muess wenigschtens en Entwurf parat haa un säge chönne was mer denoo mit denne Heftli wenn mache. --Chlämens 12:12, 26. Dez. 2009 (MEZ)[Antwort gee]

Zue mir het dr Manuel gsait, är chennt Gäld vum Schwyzer Wikimedia-Verein organisiere, wänn s sowyt isch. Aber ich find au, mer sotte scho ne fertige Entwurf haa.

Bruche chennt mr eso ne Heftli scho, z. B. fir Wärbig, wämer naime di Alemannisch Wikipedia vorstellt usw. Dää Entwurf, wu s scho git, find i aber zimli bled. No myre Meinig sott e Wikiheftli ender e Querschnitt dur di ganz Alemannisch Wikipedia biete, d. h. verschideni Themene, verschideni Dialäkt, derzue ne Yyfierg in d Wikipedia. Ich schon emol eso ebis aagfange, aber mer miesst die Artikel no chirze (pro Artkel villicht ei Syte) un Tabälle verhagle bi dr pdf-Funktion s ganz Format. Uußerdäm sott mer e besseri, v. a. chirzeri Yyfierig derzue schryybe. --Holder 08:13, 3. Jan. 2010 (MEZ)[Antwort gee]

I find, mr sotte de Schwäärpunkt meh ùf d'Artikel verlege wie ùf d'Hilfsitte. Wèr zùm èrschte Mool vù uns höört, indressiert sich wohrschinnts nìt defǜr, was unseri Richtlìnie ǜbber Neudralität odder Ùrheberrächt sìn, des wird èrscht wichtig, wè'mer aafangt mìtschribe – di allerwichtigste Richtlìnie, s Brofil ùn s WSIGA (evtl. nùmme s Wichtigst) sìn doo wesentlig indressanter.

Zù de Artikelusswahl: i find's wichtig, dass mer doo Artikel nǜmmt, wùù ìn Bezùùg ùf Dialäkt ùn Thema noo breiter gfächert sìn, zùm zeige, dass wirkli alli Dialäkt ùn alli Theme wìllchùù sìn.

Die Artikel z chürze wird abber schwìrig: e Zämmefassig schribe mießt de Hauptautor, sodass de Dialäkt erhalte blibbt, abber vili vù denne Lüt sìn gar nǜmmi doo. Mr sotte also vù Aafang aa nìt allzüe langi Artikel neh. Ei Sitte broo Artikel find ich pèrsönlig e bìtz wenig, wiil e durchschnìttlige Artikel doch mindestens dräi Sitte fǜllt (2-3 Sitte wäre also ideal) ùn ansunschte de Ìnhalt arg iigschränkt isch.

I ha jetz moll e baar Artikel ussgwählt, chürze mießt mer einzelni nadürlig ìmmer no. Lüeg doo: Benutzer:Strommops/Biecher/Alemannischi Wikipedia. --Strommops ð 13:28, 3. Jan. 2010 (MEZ)[Antwort gee]

Was uf jedeFall no dryy muess, isch e Artikel uf Laindertitzschu ;-) --Holder 16:33, 3. Jan. 2010 (MEZ)[Antwort gee]

Also ich find de Aasatz scho emool ganz güet. De Schwerpunkt sötte mer uf regionali Theme setze, aber au sunscht en Querschnitt durch d Wikipedia bringe. Un ich denk mer chönne ruhig e paar Artikel chürze; des isch warschynts gar nit z vermeide wyl en Grossdeil vo de Artikel wo guet gmacht sin, ebe e weng lenger sin. Mit Richtlinie findi längts wemmer s Profil un was d Wikipedia überhaupt isch bringe. Usserdäm e Aaleitig wie mer cha mitmache. Wie lang meineter söll des Biechli überhaupt sy? S Heftli vo der Muettersproch-gsellschaft isch zirka 80 Syte lang, was für üs vilycht fascht z vil isch. --Chlämens 09:13, 5. Jan. 2010 (MEZ)[Antwort gee]

Was fǜr regionali Artikel deetsch konkret no driineh (Ortsartikel, Dialäkt, Kultur, Gschicht, ...)? Di ganze Mindestaaforderige etc. bruucht's wäge mììr au nìt, abber de Abschnìtt FAD schù – zùm d'Grücht zerstreue, dass mììr dete doo e standardisierts Alemannisch schribe. ;-)

Wäge de Längi: die 69 Sitte cha mer vìllicht ùf 40-50 chürze, abber i deet ùf kei Fall z viil ewèggchürze, wiil sich einzelni Artikel ansunschte chuum no lohne. --Strommops ð 19:21, 5. Jan. 2010 (MEZ)[Antwort gee]