Zedler-Priis 2014 för frais Wösse

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Würdigung vom Zedler-Priis[Quälltäxt bearbeite]

Pokal zum Zedler-Bryys 2014 in dr Kategory II "Community-Projäkt vum Johr"

Di alemannischi Wikipedia het zäme mit de nidertütsche Wikipedia de Zedler-Priis 2014 för frais Wösse gwune. De al-Qamar, de Holder, de Manuel und de Stephele sind am 24. Mai 2014 z Frankfurt gsii und hend de Priis entgegegnoo.

De Priis goot an ali Mane und ali Fraue wo a de alemanische Wikipedia mitgschaffet hend: a d Gründer, a die wo di alemanischi Wikipedia uufbaut hend und a die wo si hütt no lebig und frisch bhaltet. Er goot an ali wo Artikel - vill, wenig oder au nume ananzige - gschribe hend, an all die, wo die Artikel verbesseret hend, an all die wo fast unsichtbar im Hindergrund gschaffet hend, und natürli au a die, wo uufputzet, wenn näbis falsch gloffen isch. Churz: an ali Mensche, wo di letschte zee Joo för d Verbraitig vo fraiem Wösse uf alemanisch mitgwörklt hend. E herzlich Dankeschöö an all die vile Mensche, wo kreatiiv die alemanischi Wikipedia zu dem gmacht hend, wo si hüt isch!

Mit dem Priis vo de Wikimedia Tütschland a die alemanischi und nidertütschi Wikipedia isch e wunderbars Zaiche gsetzt wore, as chlinneri Sprooche und Tielekt e wichtige Biitraag laiste chönd, frais Wösse z vermittle, genau so wie di groosse Weltsprooche! Vor e paar Joor het no menge d Nase grümpft debii! Üsen Iisatz het sich aso gloonet und mer taared üs froie öber de groossi Fortschritt.

S Loob und de Dank gelt aber nöd nume för üüs, sondern au an ali Mitarbaiter vo de nidertütsche Wikipedia und öberhopt an ali Mensche, wo sich för chlini Sprooche und Tielekt iisetzed!

Em Samstigoobed hemmer z Frankfurt nebet enere Uurchund no en "Pokal" öberchoo. De Pokaal söll bi jedem Treffe an en anderi Mitarbaiteri oder en andere Mitarbaiter vo de alemanische Wikipedia ggee were.

Nebet de Urchunde und em "Pokaal" hemmer no e Guetschii öberchoo, för vier Tailnemer a de Wikicon z Köln im Herbst 2014. Da isch en aimooligi Glegehait, vili interessanti Mensche chenezlerne, wo sich kreatiiv för frais Wösse iisetzet.

De Priis froit mi riisig und i hoff, as di alemanischi Wikipedia - jetz wo si grooss woren isch - witter e bunti Bluemewise blibt, und e lebige Kontrast zo de groosse englische und tütsche Raaseflächine bildet. E herzlichs Dankeschöö an ali! --al-Qamar

Protokoll[Quälltäxt bearbeite]

Priisvertailig z Frankfurt[Quälltäxt bearbeite]

A de Priisvertailig gsii sind vo de alemannische Wikipedia: de al-Qamar, de Holder, de Manuel und de Stephele.

De ofizielli Aalas het em Samstig, 24.Mai 2014 mitere liechte Verspöötig z Oobed nochem sechsi agfange miteme Empfang, wo sich Tailnemer vo de verschidnige Projet zerscht emole de Buuch vollgschlage hend. De Holder isch Tail vo de Jury i de Kategorii III gsi un het au d Laudatio ghalte, wege dem het er au erscht no de Priisvertailig a s Büffet töre ...

Deno simmer in Saal bette wore, wo d Priisvertailig stattgfunde het. D Gwünner vom Zedler-Priis 2014 sind:

  • Kategorii 1 Wikipedia-Artikel vom Joor: de:Spiropterakarzinom
  • Kategorii 2 Community Projekt vom Joor: di nidertütsch Wikipedia zäme mit de alemannische Wikipedia
  • Kategorii 3 Externs Projekt vom Joor: Humanitarian Openstreetmap Team: Taifun Haiyan-Projekt

Noch de Priisvertailig hemmer üüs no mit verschidnige Wikipedianer und Tailnemer vo anderne verwandte Projekt im Foyer troofe und noiji Kontäkt gschlosse und au interessanti Diskusione gfüert.

Alemanisches Wikpediatreffe z Darmstadt[Quälltäxt bearbeite]

Am alemannische Wikipediatreffe noch de Priisvertailig sind gsii: de al-Qamar us de Schwiz, de Holder us Bade-Württeberg und de Stephele us em Elsiss.

Noch de Priisvertailig simmer z Dritte uf Darmstadt gfaare und hend bis spoot i d nacht dischgeriert und mer sind al so uufgregt gsii, asmer em Sunntig Morge all früe uufgstande sind. Folgendi Pünkt sind bischlosse wore:

  • De Pokal söll bi jedem Treffe vo de alemannische Wikipedia anen anderi Bnutzri oder anen andere Bnutzer goo. Zur Zitt stoot de Pokal ufem Kalvier bim al-Qamar dihamm und tar gege Voraameldig gern aglueget were.
  • De al-Qamar organisiert endi Summer (Augste) en alemannisches Wikipediatreffe z Zöri.
  • Wer gern au finanziell vom Priis näbis haa möcht, cha sich aamelde för d Wikicon z Köln. Wenns mee as vier Intressierti het, entschaidet di alemannsichi Gmainschaft, wer gratis uf Köln tar.
  • Denn hemmer ono echli öber di (z. T. weniger) guete alte Ziite vo de alemannische Wikipedia dischgeriert und di jetzigi Situation analysiert.

Bilder[Quälltäxt bearbeite]

de Pavel Richter eröffnet d Veraastaltig |Priisträger und Nominierti i de Kategorii II |de Holder verchündet als Juror de Gwünner vo de Kat. III |alli Priisträger und Nominierte noch de Priisvertailig |de Stephele, de al-Qamar und de Holder (vo links uf rechts) mit em Pokal

Weblingg[Quälltäxt bearbeite]

 Commons: Zedler-Priis 2014 – Sammlig vo Multimediadateie