Walgau

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Panorama fum Walgau

Dr Walgau isch a Tal im Süda vo Vorarlberg. Er isch im Süda vom Rätikon abgränzt und im Norda gohts is Rhital. Di einzig Stadt vom Walgau isch Blodaz mit ebba 14'700 Iwohner. Dr ganz Walgau hat ebba 48'000 Iwohner. Im Süda vo Blodaz kummt ma is Muntafu. Dr Fluss, wo durch an Walgau flüßt, hoaßt Ill, wo spöter in Rhi flüßt.

Geografische Lag[ändere | Quälltäxt bearbeite]

Dr Walgau goht vo Blodaz bis ge Frastaz - Felsenau, kurz vor da Schlucht ge Feldkirch. Dr gröscht Bergzug im Süda isch da Rätikon. Wichtige Bärg im Walgau senn d Zimbaspitz in Bürsch (Blodaz), wo ma oo gern ge klättra goht, und d drei Schwöschtra, wu wegat irna drei Bärggipfel da Nama hat.

Dr Walgau isch entstande, wo sich da Alpa ufgfaltet häi (35 - 30 Milliona Johr). Während da Iiszit isch da ganze Walgau, und oo ganz Voradlbärg, vo anam oanziga großa Glätscher überzoga gsi.

Dialekt[ändere | Quälltäxt bearbeite]

Luag oo da Artikel Voradlbärgisch.
D Walgauer redand wie di meischta Voradlbärgr an Alemannischa Dialekt. Markant für d Oberländr sind die Diphthong „ou“ und die „a“-Lut. Aber oo des variiert im Walgau. Im Gegasatz zu da Unterländr isch s Walgaurisch weniger vo da Schwitzerdialekt beiflusst. Dr untere Teil vom Walgau hat noch a kle vom Liachtastanerisch igmischt. Je noch dem, wia südlich a Dorf scho ligt, kriagt ma den Muntafuner Dialekt me zum spüra.

Kultur[ändere | Quälltäxt bearbeite]

Da Walgau hat markannta Merkmale vo da Feschtr:

Faschingsumzüg: Im Walgau gits eigentlich in jedam Dorf an eigana Faschingsumzug, wo denn an huffa Mäschgarle, großteils vo Vereina und Schuala mitgonnd. Da gröschte Faschingsumzug im Walgau ischt alljohr z Frastaz. Es isch an Nachtumzug mit am Fürwerk und hoasst Schaanerriad.

Funka: A fascht jedes Dorf im Walgau hat vo 2 bis zu 5 Funka im Joor, ufteilt a da zwo jöörlicha Funkatäg, zum Bispil am Funkasonntag. Zum Beispiil Frastaz hat z Fellagattr, z Frastafeders, z Amerlüga und z Gampelün jeds Joor an Funka brenna. Wenn d Hex uf am Funka ned explodiert würd se a Wochanend spötr vrrgraba. Uf sollna Funka spillt oh meischtens a Musik und es git traditionellrwis Bier und Wi zum trinka.

Vor allam di ältere Generation ischt noch sehr katholisch. Fascht jede einzelne Parzella im Walgau hat a eigene Kapella, jedes Dorf hat a Kircha.

Susigs[ändere | Quälltäxt bearbeite]

Es git sus noch a paar interessanti Randdata. Zum Beispiel senn übr 50% vom Walgau bewaldat. D Walgauer Gmoanda senn vo 510 - 588 Metr übrm Meer platziert, es git jedoch oo so Bärgdörfle wia zum Beispiel Dünserbärg, wo höher als 1200 Meter ligand. Kline Dörfle sind wia oo im Muntafu ned selta, so hat zum Beispiil da Dünserberg gad amol um di 140 Iwohner und davo gad amol 8 Schüaler. Im Walgau lebend me alte as wia junge Lüt. Da Tourismus hats zum Teil wegs am Schifahra, aber oo im Summer uf da Alpa.