Volkshochschule beider Basel
| Volkshochschule beider Basel | |
|---|---|
| Schueltyp | Volkshoochschuel |
| Gründigsjohr | 1919 |
| Adräss |
Kornhausgasse 2 |
| Ort | Basel |
| Kanton | Basel-Stadt |
| Staat | Schweiz |
| Leitig | Hans Ulrich Schudel (Bresidänt vo dr Stifdig sit 2010) |
| Website | [1] |
| Dialäkt: Baseldütsch |
D Volkshoochschuel vo bäide Basel (churz VHS BB) isch e öffentligi Leerinstituzioon für Erwaggseni, wo äng mit dr Universidäät Basel verbunde isch. Si wird vo dr «Stiftung Volkshochschule und Seniorenuniversität beider Basel» dräit, und vo de Kantöön Basel-Landschaft und Basel-Stadt mitfinanziert. D Veraastaltige behandle Theme us verschidnige Wüssensgebiet, und die mäiste Dozäntinne und Dozänte gäbe au an dr Uni Underricht.
Gschicht[ändere | Quälltäxt bearbeite]
D Volkshoochschuel Basel isch 1919 vo zwäi Brofässer gründet worde, vom Altphiloloog Johannes Stroux und vom Botaniker Gustav Senn. Si isch dr Uni aagliideret gsi: mä het sich im Kollegiegeböid am Petersblatz iigschriibe, d Vordrääg häi in de Uni-Höörsääl stattgfunde und d Leerer si Dozänte an dr Uni gsi. D «Kommissioon für d Volkshoochschuelkürs» het us Brofässer us allne Fakulteete bestande, eme Mitgliid vom Basler Erzieigsroot, eme Verdräter vo dr Kuratel und e baar Verdräter vo dr Höörerschaft.
1938 isch dr Biologiibrofässer Adolf Portmann Bresidänt vo dr Kommissioon worde und het sich drfür iigsetzt, ass d Volkshoochschuel mee Unabhängikäit vo dr Uni bechiem. 1966 isch d Läiterstell iigfüert worde, und d Kommissioon het dr Werner Humm zum erste Läiter gweelt. S Sekretariaat isch im Huus zum Stäärne an dr Münzgass underbrocht worde und bruefsbezoogeni Usbildigsleergäng si iigfüert worde. Under em Humm sim Nochfolger, em Walo F. Eppenberger (1979 bis 1990) si Zertifikatskürs für Fremdsprooche iigfüert worde und d Senioore-Universidät isch ufdoo worde. Sit 1980 si d Volkshoochschuel, d Senioore-Universidät und s Universidätsforum im «Zentrum für Erwaggsenebildig vo dr Universidät Basel» (churz ZEB) zsämmegfasst.
Wil fast d Helfti vo de Höörer us em Baselbiet cho si und mä au Kürs het welle uf em Land organisiere, het au dr Kanton Basel-Landschaft aagfange sich für d Volkshoochschuel iizsetze und iire Name isch zu «Volkshochschule beider Basel» gänderet worde. 1987 isch d Stifdig gründet worde und sit denn isch d Volkshoochschuel nume Däil vo dr Verwaltig vo dr Universidät, aber d Uni isch im Stifdigsroot immer no stark verdräte.
Under em Klaus Burri (1990 bis 2001) isch d VHS BB in dr Stadt und uf em Land witer usbaut worde. 1992 isch e Gschäftsstell z Lieschdel ufdoo worde und im Joor 2000 isch d Volkshoochschuel Laufe-Thierstäi em ZEB aagliideret worde, wil s Laufedaal zum Kanton Basle-Landschft choo isch. S Aagebot isch vilfältiger worde und mä het brobiert, de räine marktwirtschaftlige Überleegige nid allzu vil Gwicht z gee.
Wil d Zaal vo de Höörer zrugggange isch, het d ZEB finanzielli Schwiirikäite überchoo und d Stifdig het müesse reformiert wärde. D Gschäftsstelle z Lieschdel und z Laufe si gschlosse worde, mä het d Kürs usbaut, wo vil Erfolg gha häi, und weeniger populääri gstriche, dr Stifdigsroot isch verchliineret und d Verbindig zur Uni versterkt worde.
Brobleem[ändere | Quälltäxt bearbeite]
E Brobleem mit dr Basler Volkshoochschuel isch, ass si vor allem d Middelschicht aaspricht, Lüt, won e Bruefsusbildig hai oder Akademiker si. Das häisst si het bildigsfärni Bevölkerigsschichte kuum erräicht. Drzue chunnt, ass s Alter vo de Däilnäämer im Vergliich zu andere Schwizer Volkshoochschuele überdurchschnittlig hooch isch und d Manne underverdräte si. Sit de 1970er het sich das immer mee zuegspitzt.