Vierschanzetournee

D Vierschanzetournee isch e Sportwettbewärb, wo vier Skispringe zämefasst. Si findet syt 1953 ume Jahreswächsel z Dütschland und z Östrych statt. Für d Skispringer isch d Tournee näbed de Olympische Winterspiil, de Nordische Ski-WM und em Skisprung-Wältcup de wichtigsti Wettkampf. Die vier Tourneespringe ghööred au zum Wältcup.

Gschicht[ändere | Quälltäxt bearbeite]

S ältisti vo de vier Tourneespringe isch s Nüüjahrsspringe z Garmisch-Partenkirchen. Es isch 1921/22 entstande. 1949 hend d Skiclüb vo Partenkirchen und Innsbruck zwei Springe churz hinderend welle durefüere. Wil churz nach em Chrieg no kei usländischi Sportler hend chönne uf Dütschland yreise und dütschi Sportler nid is Usland hend chönne reise, het d Umsetzig vo de Idee erst 1952 möglich gsi. Am 17. Mai 1952 isch die Dütsch-Öschtrychischi Springertournee gründet worde. Zue de drü Usträgigsort Partenkirchen, Innsbruck und Bischofshofen bi Salzburg het mer en zweite dütsche Ort dezuegnuu. D Wahl isch uf Oberstdorf im Allgäu gfalle.

S ersti Springe isch am 1. Jänner 1953 s Nüüjahrsspringe z Garmisch-Partenkirchen mit 20'000 Zueschauer und 50 Skispringer gsi. Die ersti Tournee isch bis am 11. Jänner gange. De Öschtrycher Sepp Bradl isch erste Gsamtsiiger vor zwei Norweger worde. Bi de nächste Tournee isch dr Ablauf gänderet worde, wo bis hüt bybhalte worden isch. Als ersts Springe isch no Ändi Dezämber das z Oberstdorf duregfüert worden, denn Garmisch-Partenkirchen am 1. Jänner, s Springe vo Innsbruck und am Schluss s Drükönigsspringe z Bischofshofen. I de 1950er-Jahr hets Versüech gäh, s Wienachtsspringe vo Oberhof (damals i de DDR gläge) i d Tournee ufznäh, doch de Reisestrapaze wäred zu gross gsi. Glychwohl isch de Helmut Recknagel us de DDR eine vo de erfolgrychste Springer vo de Aafangszyt worde.

Bi de achte Usträgig 1959/60 hets en Flaggestriit gäh, wil d BRD die nüüi Flagge vo de DDR nid anerchännt het. D Athlete us dem Land hend aber nid druf verzichte welle. Au Öschtrych het sich em Druck vo de Westdütsche büügt, und so het d DDR zäme mit de Mannschafte us Pole, de Sowjetunion und de Tschechoslowakei boykottiert. Im Jahr druf het mer als Kompromiss d DDR-Springer mit de Fahne vo ihrem Skiclub starte lah. De Helmut Recknagel het damals zum letschte Mal d Tournee gwunne. Ab 1961 bis 1965/66 het d DDR wägere Sperri nid döffe teilnäh. I de 1970er-Jahr hend d Athlete us de DDR denn füfmal de Siig gholt.

1964/65 sind d Ergäbnis zum erste Mal mit Computer übermittlet worde. Ab de 1970er-Jahr het mer en Sponsor zueglah. En wyteri Nüüerig isch de V-Stil am Aafang vo de 1990er-Jahr gsi. Wil de Stil zue lengere Sprüng gfüert het, het mer d Schanze müesse modernisiere.

Em Sven Hannawald isch es bi de 50. Tournee 2001/02 als erstem Springer glunge alli vier Springe vonere Tournee z gwünne. Das en historische Erfolg gsi. S glyche isch denn 2017/18 em Pol Kamil Stoch und 2018/19 em Japaner Ryōyū Kobayashi glunge. Es het aber au scho acht Mal en Springer d Gsamtwärtig vo de Tournee oni Einzelsiig gwunne. De vierfachi Schwiizer Olympiasiiger Simon Ammann het drümal es Springe gwunne, aber no nie d Gsamtwärtig.

Weblink[ändere | Quälltäxt bearbeite]

Commons: Vierschanzetournee – Sammlig vo Multimediadateie

Dä Artikel basiert uff ere fräie Übersetzig vum Artikel „Vierschanzentournee“ vu de dütsche Wikipedia. E Liste vu de Autore un Versione isch do z finde.