Urs Viktor Oberlin

Dr Urs Victor Oberlin (* 5. Septämber 1747 z Solodurn; † 6. Novämber 1818 z Solodurn ) isch e Schwiizer Politiker in dr Ziit vo dr Helvetik gsi.

Läbe

Dr Urs Victor Oberlin isch am 5. Septämber 1747 z Solodurn uf d Wält cho as Sohn vom Josef Wilhelm Oberlin, eme Schriiner, und dr Anna Maria Stampfli. Er isch mit dr Catharina Rousseau verhürotet gsi. As Bruef het er zerst as Pastetebecker, und spöter as Duechhändler gschafft.

Si Politischi Laufbahn

Noch dr Französische Revolution het sich au z Solodurn, wo vo patrizische Familie beherrscht worden isch, dr Wunsch vo de Bürger noch Mitbestimmig versterkt und e baar Bürgerligi si in d Regierig ufgnoh worde, drunder dr Oberlin. Er het aber die revolutionäre Patriote understützt, wo z Solodurn d Patrizier hai welle stürze, und isch wäge däm ins Gfängnis cho. Nodäm d Franzose in d Eidgenosseschaft iigfalle si, isch dr Oberlin dank em Druck vom General Balthasar Alexis Henri Antoine von Schauenburg am 3. Merz 1798 Presidänt vo dr provisorische kantonale Solodurner Regierig worde und drei Wuche druf Mitgliid vom Obergricht. D Proklamierig vo Helvetische Republik am 12. April 1798 het s Ändi vom Ancien Regime in dr ganze ehemolige Eidgenosseschaft bedütet. Die gmässigte Republikaner hai dur e gschickti Wahltaktik Macht in dr Exekutive übernoh und hai dr Oberlin am 17. April 1798 in s Diräktorium gwehlt, und währed siiner Amtsziit isch er zweimol Presidänt worde. Noch em Erste Staatsstreich am 7. Jänner 1800 isch s Diräktorium ufglöst worde.

Noch dr Politik

Noch siim Sturz het er d Politik verloh und isch wider Duechhändler worde. Er isch am 6. Novämber 1818 z Solodurn gstorbe.

Iischetzig

Dr Oberlin wird als en ehnder opportunistische Politiker, wo nit bsundrigs wichdig gsi isch, beurdeilt.

Quelle

• H. Sigrist, Solothurner Kantonsgeschichte, Band 3