S Universidääts-Chinderspiddaal vo bäide Basel

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Universidääts-Chinderspiddaal vo bäide Basel
Unternähmensform öffentlig-rächtligi Aastalt
Dräägerschft: Spiddaalroot, Kantöön Basel-Stadt und Basel-Landschaft
Gründig 1862 (Chinderspiddaal Basel); 1999 (Zämmeschluss zum UKBB mit dr Chinderklinik Bruederholz, BL)
Sitz Basel, Schwiz
Leitig

Dr. med. Conrad E. Müller, Vorsitzend vo dr Gschäftsläitig, CEO UKBB

Mitarbeiter 800
Branche Gsundhäitswääse
Uffdritt im Netz http://www.ukbb.ch/ UKBB
Dialäkt: Baseldütsch

S Universidääts-Chinderspiddaal vo bäide Basel (churz ‚UKBB‘) isch en äigeständigs, universidäärs Zentrum für Chinder- und Jugendmedizin und für Leer und Forschig z Basel.

S UKBB bestoot sit 1999 und isch am 29. Januar 2011 in dr Nöibau an dr Spiddaalstrooss 33 z Basel umzooge. Die farbigi Fassade vom Geböid isch s Woorzäiche vom Spitaal. Es het öbbe 800 Mitarbäiterinne und Mitarbäiter, wo sich in verschidnige Abdäilige jeedes Joor um öbbe 6'600 stazionäri Buschi, Chinder und Jugendligi kümmere und öbbe 78'000 ambulanti Behandlige mache. Im UKBB isch die grössti chinderorthopedischi Abdäilig in dr Schwiz und äini vo de grösste Chindernotfallstazioone. S Spiddaal het 100 Bett und 16 Bett in dr Neonatologii in dr Fraueklinik vom Universidäätsspiddaal Basel

D Notfallstazioon[ändere | Quälltäxt bearbeite]

D Notfallstazioon im UKBB isch rund um d Uur bsetzt. Si isch en Aalaufstell für Notfälle und cha au über s Delifoon hälfe. si füert öbbe 26'000 Konsultazioonen pro Joor us und ghöört zu de gröösste in dr Schwiz. Si bewältigt pro Daag vilmol mee as hundert Konsultazioone und git bis zu 70mol Uskumft über s Delifoon.

Gschicht[ändere | Quälltäxt bearbeite]

As dr ursprünglig Geburtsdaag vom Basler Chinderspiddaal gältet dr 2. Januar 1862, wo s nöi baute Spiddaal am Rhiiufer im Chläinbasel eröffnet worden isch. Es het zerst 40 Bett gha und het lang as Musterbau für e Chinderklinik gulte. Übbe 30 Joor spööter het s Chinderspiddaal schliesslig dr erst Operazioonssaal ufdoo und bald druf s erste Röntgegräät installiert. D Bevölkerig isch noo di noo gwaggse und mit ere d Zaal vo de Paziänte: vo 120 im Joor 1862 uf öbbe 6'500 im Joor 2009.

D Fusioon zum Universidääts-Chinderspiddaal vo bäide Basel[ändere | Quälltäxt bearbeite]

Am Aafang vo 1999 häi sich die bäide kantonale Chinderspiddäler z Basel und uf em Bruederholz zum Universidääts-Chinderspiddaal vo bäide Basel (UKBB) zämmegschlosse, won e öffentlig-rächtligi Organisazioon mit drei Standort isch. Wäärend an dr Römergass z Basel die allgemäini Chinderhäilkund, e Notfallstazioon und e Poliklinik dehäi si, isch d Chinderchirurgii, d Chinderorthopedii, d Intensivpflääg, und non e Notfallstazioon und Poliklinik uf em Bruederholz (Baselland). D Neonatologii, also d Abdäilig für Früe- und chranki Nöigeboreni, isch mit iire 16 Bett im Nöibau vom Basler Frauespiddaal integriert und offiziell dr dritt Standort vom UKBB. Scho bald isch s aber klaar worde, ass es Brobleem git, wenn dr Betriib verschidnigi Standort het. Wäge däm häi die bäide Kantön Basel-Stadt und Basel-Landschaft e bassendi Löösig gsuecht und schliesslig häi die bäide Regierige im August 2000 beschlosse, e nöis Spiddaal am ene äinzige Standort uf em Areal vo dr ehemoolige Fraueklinik z Basel ufzdue.

D Organisazioon[ändere | Quälltäxt bearbeite]

Verwaltig[ändere | Quälltäxt bearbeite]

S UKBB wird administrativ von ere Gschäftslätig gfüert, wo sich us Persoone us de verschidnige Beriich vom Spiddaal zämmesetzt. S Spiddaal beschäfdigt näben e Hufe Mitarbäiter in de Beriich vo dr Medizin und dr Pflääg au Lüt in underschiidlige Verwaltigs-Abdäilige.

Abdäilige / Fachberiich[ändere | Quälltäxt bearbeite]

  • Adoleszentemedizin
  • Anesthesii
  • Dermatologii
  • Endokrinologii/Diabetologii
  • Forschig
  • Gastroenterologii
  • Gynekologii
  • Infektiologii/Vakzinologii
  • Intensivmedizin
  • Kardiologii
  • Chinderchirurgii
  • Chindermedizin (Pediatrii)
  • Medizinischi Genetik
  • Neonatologii
  • Nephrologii
  • Nöiro-/Entwickligspediatrii
  • Onkologii/Hematologii
  • Orthopedii
  • Pediatriilabor
  • Pfläägdienst
  • Pnöimologii
  • Psüchiatrii
  • Radiologii
  • Rhöimatologii
  • Daagesklinik
  • Therapie/Pedagogik
  • Spiddaalpedagogik
  • Sozialberootig

Witeri Dienstläistige[ändere | Quälltäxt bearbeite]

Chinderhort «Villa Kunterbunt»[ändere | Quälltäxt bearbeite]

Im Universidääts-Chinderspiddaal git s e Chinderhort: D «Villa Kunterbunt» bietet nit nume betröits Moole und Bastle, sondern au e Bibliothek (Ussestell vo dr GGG Stadtbibliothek Basel) und e Ludothek. Das chönne d UKBB-Paziänte aber au iiri Gschwüsterte bruuche.

Spiddaalschuel[ändere | Quälltäxt bearbeite]

Zum em Chind e chli Alldaag ans Chrankebett bringe, git s im UKBB d Abdäilig Spiddaalpedagogik, wo in interdisziplinääri Tiim iibunde isch. Es si usbildeti Leerer/inne, wo d Chinder in Mathematik oder Französisch Underricht gääbe, aabasst an dr Schuelstoff und dr Gsundhäitszuestand vom Chind. Si häi Kontakt mit dr Schuel, für dass s Chind wäge dr Chrankhit si Blatz in dr Klass nit verliert.

Organisazioone /Veräin / Kooperazioone / Stifdige[ändere | Quälltäxt bearbeite]

Belop[ändere | Quälltäxt bearbeite]

D Mitgliider vom Veräin Belop (Begleitig vo de Eltere wäärend dr Operazioon vo iirem Chind) kümmerr sich um Eltere, wo s Chind von ene grad operiert wird. Belop entlastet eso die Mitarbäitende im Spiddaal wie au die Eltere.

Spiddaalglöön[ändere | Quälltäxt bearbeite]

Über die Stifdig Theodora bechömme die chliine Paziäntinne und Patiänte äimol in dr Wuche Bsuech vo de Draumdokter.

Stifdig Pro UKBB[ändere | Quälltäxt bearbeite]

D Stifdig Pro Universidääts-Chinderspiddaal vo bäide Basel isch am 6. Januar 2005 gründet worde. Si setzt sich für die langfristigi Entwicklig vom Universidääts-Chinderspiddaal vo bäide Basel (UKBB) ii.

S Ronald McDonald Huus[ändere | Quälltäxt bearbeite]

S Ronald McDonald Huus Basel git sit em Ändi vo 2010 de Eltere vo chranke Chinder en Unterschlupf.

Forschig[ändere | Quälltäxt bearbeite]

Forschigsgebiet[ändere | Quälltäxt bearbeite]

Die klinisch-epidemiologische (wo d Praxis bedräffe) und experimentelle Forschigsgebiet, wo am UKBB verdräte si, si in d Forschigsschwerpünggt vo dr Medizinische Fakultäät vo dr Universidäät Basel integriert und si mit e Hufe Arbitsgrubbe us dr Klinik und dr biomedizinische Forschig im In- und Usland vernetzt. Die so genannti Grundlaageforschig vom UKBB isch im Departemänt für Biomedizin vo dr Universidäät aagsiidlet.

Bsundrigi Bedütig häi die Forschigsschwerpünggt im UKBB:

  • Entwickligspediatrii/Nöiropediatrii
  • Immunologii/Infektiologii
  • Orthopedii
  • Pnöimologii

Usbildig, Fortbildig und Witerbildig[ändere | Quälltäxt bearbeite]

S UKBB bildet zuekümftigi Chinderärzt, Pflääger und Therapöite us. Im Spiddaal het s au Leerstelle in de verschiidenste Beriich.

Weblingg[ändere | Quälltäxt bearbeite]

Information icon.svg Dä Artikel basiert uff ere fräie Übersetzig vum Artikel „Universitäts-Kinderspital_beider_Basel“ vu de dütsche Wikipedia. E Liste vu de Autore un Versione isch do z finde.