Tim Berners-Lee

Us der alemannische Wikipedia, der freie Dialäkt-Enzyklopedy
Tim Berners-Lee
Dr erscht Webserver vu dr Wält, entwicklet un implemäntiert vum Berners-Lee uf eme NeXTcube-Computer

Dr Sir Timothy John Berners-Lee, OM, KBE, FRS (* 8. Juni 1955 z London) isch e britische Physiker un Informatiker. Är isch dr Erfinder vu dr HTML (Hypertext Markup Language) un dr Begrinder vum World Wide Web. Hite stoht er em „World Wide Web Consortium“ (W3C) vor, isch Brofässor am Massachusetts Institute of Technology (MIT) un het syt 2004 e Lehrstuel an dr Universitet Southampton.

Biografi[ändere | Quälltäxt bearbeite]

Erschti Johr[ändere | Quälltäxt bearbeite]

Dr Tim Berners-Lee isch dr Suhn vum Conway Berners-Lee un dr Mary Lee Woods, eme Mathematiker-Ehbaar, wu dr Manchester Mark I mitentwicklet het. Scho in syre Juged het er sich mit Computer bscheftigt. Noch em Abschluss an dr Emanuel School z Battersea het er an dr University of Oxford z Ängland Physik studiert, wun er 1976 am Queens College abgschlosse het. Är isch derno fir zwai Johr bi dr Plessey Telecommunications Ltd (Poole, UK) gsii un isch anne 1978 zue D.G Nash Ltd (Ferndown, UK) gwächslet, wun er as Software-Entwickler gschafft het. In syre Zyt as berotende Ingenieur het er vu Juni bis Dezämber 1980 syy erschte Kontakt zum Europäische Chärnforschigszäntrum CERN ghaa. 1981 bis 1984 isch er Diräktor vu Image Computer Systems z Bournemouth gsii, isch aber 1984 wider zum CERN zruckchuu.[1]

Dr Berners-Lee un s World Wide Web[ändere | Quälltäxt bearbeite]

Ai Broblem am CERN isch gsii, dass e Dail vu dr Laboratorie uf franzesischem Biet sin un a ander Dail uf em Biet vu dr Schwyz. In dr zwoo Länder het s e unterschidligi Netzwärch-Infrastruktur gee, wu dr Uusdusch vu Informatione schwäre gmacht het, zum Dail au uumegli. Anne 1989 het dr Berners-Lee syym Arbetgeber CERN e Brojäkt vorgschlaa, wu uf em Brinzip vum Hypertext dr wältwyt Uusdusch un d Aktualisierig vu Informatione zwische Wisseschaftler hätt sotte aifacher mache. Är het des Brojäkt verwirkligt un het doderzue d Sytebschrybigssproch HTML, s Transferprotokoll HTTP, d URL (dr Name isch aber erscht speter ufchuu), dr erscht Browser „WorldWideWeb“ un dr erscht Webserver „CERN httpd“ unter em Bedribssyschtem NeXTStep entwicklet. Des isch dr Ursprung vum World Wide Web gsii.

Dr Berners-Lee het di erscht Websyte erstellt, http://info.cern.ch. Die Websyte git s hite no, vum urspringlige Inhalt git s aber nume no ne Kopi vu anne 1992[2]. Si erklert unter anderem,

Urspringlig isch des au di erscht aifach Suechmaschin gsii, wel dr Berners-Lee au no no andri Websyte ußer syre aigene gluegt het.

D Grundidee vum World Wide Web sin verglychswys aifach z verstoh. Dr Berners-Lee het si aber in ere Art un Wys mitenander verchnipft, wu d Megligkait bis hite nonig ganz uusgschepft sin.

Anne 1994 het dr Berners-Lee s World Wide Web Consortium (W3C) am Massachusetts Institute of Technology grindet. Wichtig fir d Entwicklig vum World Wide Web isch gsii, dass er syy Idee un technische Umsetzige frei wytergee un nit badäntiert ghaa het. Au uf d Maxime vum World Wide Web Consortium, nume badäntfreji Standard z verabschide, het er e starke Yyfluss ghaa.

In syym Buech Weaving the Web (dytsch: Der Web-Report, 1999) wird z. B. des betont:

  • S Web editiere z chenne isch glych wichtig, wie dur s Web z browse.
  • Computer chenne gnutztz wäre, go im Hintergrund Ufgabe z mache, dass Gruppe besser chenne zämmeschaffe.
  • Jede Beraich vum Internet sott ender e Netzstruktur haa wie ne Baumstruktur. Wichtigi Uusnahme sin Domain Name System un d Regle fir d Vergab vu Domainnämme dur d ICANN.
  • Informatiker drage au ne moralischi Verantwortig, nit nume ne technischi.

Em Berners-Lee syy Vorstellig vu dr Zuechumft vum Internet isch s semantisch Web.

Är isch syter anne 1999 dr Inhaber vum 3Com-Founders-Lehrstuel am Laboratory for Computer Science vum MIT. Derzue stoht er em World Wide Web Consortium vor, em vu ihm grindete uffige Forum fir Unternämme un Organisatione, wu di wyter Entwicklig vum WWW beglaitet.

Fir 2010 isch s World Wide Web fir dr Fridesnnobelbryys vorgschlaa wore. Wel nume Institutionen mit persenlige Represäntante derfe uuszaichnet wäre, isch dr Tim Berners-Lee zämmew mit em Larry Roberts un em Vint Cerf vorgschlaa wore.[3]

Privatläbe[ändere | Quälltäxt bearbeite]

Dr Berners-Lee isch vu 1990 bis zur Schaidig anne 2011 mit dr Nancy Carlson ghyrote gsii. Us dr Eh stamme d Chinder Alice un Ben. 2014 het dr Berners-Lee z London sy zwooti Frau Rosemary Leith ghyrote.[4]

Uuszaichnige[ändere | Quälltäxt bearbeite]

  • 1995 Ehre-Nica vum Prix Ars Electronica fir d Yyfierig vum Hypertext[5]
  • 1998 Eduard-Rhein-Technologibryys „für die Schöpfung und Entwicklung des heute international sogenannten World Wide Web“.[6]
  • 1998 MacArthur Fellow
  • 2001 Ufnahm in dr Royal Society
  • 2002 Japan-Bryys
  • 2004 isch er vu dr Chenigi Elisabeth II. fir syy Verdienscht im Beraich vu dr Wisseschaft mit em Orde Knight Commander of the Order of the British Empire (KBE) uuszaichnet un dodermit in dr Ritterstand ghobe wore
  • 2004 Millennium Technology Prize fir syy Erfindig vum World Wide Web
  • 2005 Quadriga[7] Netzwerk des Wissens
  • Am 13. Juni 2007 isch er vu dr Chenigi Elisabeth II. in dr Order of Merit (OM) ufgnuu wore.
  • 2007 Charles-Stark-Draper-Bryys

Ehredoktorwirde[ändere | Quälltäxt bearbeite]

  • Doctor of Fine Arts (DFA hon.), Parsons The New School for Design, New York City, 1996
  • Doctor of University (DU hon.), University of Essex, 1998
  • Doctor of University (DU hon.), Southern Cross University, 1998
  • Doctor of University (DU hon.), Open University, 2000
  • Doctor of Laws (DLaw hon.), Columbia University, 2001
  • Doctor of Science (DSc hon.), Universität Southampton, 1996
  • Doctor of Science (DSc hon.),[Oxford University, 2001
  • Doctor of Science (DSc hon.), University of Port Elizabeth, 2002
  • Doctor of Science (DSc hon.), Lancaster University, 2004
  • Universitat Oberta de Catalunya, 2008
  • Polytechnische Universität Madrid, 2009

Literatur[ändere | Quälltäxt bearbeite]

  • Tim Berners-Lee und Mark Fischetti: Der Web-Report. Der Schöpfer des World Wide Webs über das grenzenlose Potential des Internets. Aus dem Amerikanischen von Beate Majetschak. Econ, München 1999. ISBN 3-430-11468-3
    • Weaving the Web. The Original Design and Ultimate Destiny of the World Wide Web. (engl. Orig. Titel)

Weblink[ändere | Quälltäxt bearbeite]

 Commons: Tim Berners-Lee – Sammlig vo Multimediadateie

Fueßnote[ändere | Quälltäxt bearbeite]

  1. Biographie bi www.w3.org
  2. Kopi vu dr erschte Websyte info.cern.ch bim W3C
  3. Sueddeutsche.de (13. Merz 2010)
  4. The Marriage of Sir Tim Berners-Lee and Ms Rosemary Leith. Abgruefen am 8. Februar 2023 (änglisch).
  5. Prix Ars Electronica 1995 Archivlink (Memento vom 9. Novämber 2007 im Internet Archive)
  6. Homepage der Eduard Rhein Stiftung Archivlink (Memento vom 15. Septämber 2013 im Internet Archive)
  7. Die Quadriga der Werkstatt Deutschland e. V. Archivlink (Memento vom 20. Februar 2009 im Internet Archive)
Dä Artikel basiert uff ere fräie Übersetzig vu dere Version vum Artikel „Tim_Berners-Lee“ vu de dytsche Wikipedia. E Liste vu de Autore un Versione isch do z finde.