Tilsiter

Tilsiter isch e Schnittchääs us Chuemilch mit ere Rotschmiiri-Rinde mit 30 bis 60 % Fett in dr Drochemasse. Si Naame chunnt vo dr Stadt Tilsit, wo hüte zu Russland ghöört und Sowetsk häisst.

Härstellig und Äigeschafte

Dr Tilsiter wird us Roomilch oder us bastörisierter Milch gmacht. Dr Roomilchchääs isch im Gschmagg riicher. Dr Chääs wird in Raadform häärgstellt, hüte aber immer mee au in Blockform. Er het e dünni, brüünligi Rinde, wo öbbe säggs Mönet rift und in dere Zit mit Salzwasser und Rootschmiirikultur abgriibe wird. Dr hellgääli Däig isch wäich, seer elastisch und zimlig füecht, er het Löcher in dr Gröössi vo Gärstechörner und chlaini Schlitzli. D Gschmacksskala goot vo mild und licht würzig bis chreftig pikant.

Tilsiter wird sit 1893 in dr Ostschwiz und au z Dütschland härgstellt. Au z Russland häisst er Tilsiter (russisch Тильзитер) und z Pole Tylżycki (Tilsiter).

Weblingg

Commons: Tilsiter – Sammlig vo Multimediadateie

Tilsiter i de Datebank vom Kulinarische Erb vo de Schwiz
Slow Food Hamburg Tilsiter
Tilsiter Switzerland
Tilsiter uf de Website vo Agroscope