Text:Otto Gittinger/So semmer Leut/Wohl fort!

Wohl fort!

"Der ischt wohl fort!" heißt's überall
Wo's Jergles Fritz ischt aus am Tal.
"Do drüba-n-en Amerika,
Do wird mer em schaun 's Naitigscht sa',
Dem Lomp, nenz hot er g'wißt wia saufa
Ond aller Liedrichkeit nochlaufa.
Was hot der Bua doch seine Leut
Ens Haus g'macht Kreuz ond Herzeleid!
Jetz hot mer'n nüber über's Meer,
Gottlob, do kommt er nemme her!"
Dia Täg komm' i am Haus verbei
'S ischt so a schöner Obed g'sein.
Sei Muater ontram Fenschter stoht
Ond guckt wia bannt en's Obedrot.
Ganz still em Beta d'Lippa gean,
Ond d'Auga voll mit Wasser stean,
Ond beide Händ druckt se ufs Herz.
O Muaterliab! i weiß dein Schmerz.
Om d' Welt net siag i jetz des Wort,
Des jeder sait: "Der ischt wohl fort!"