Text:Otto Gittinger/So semmer Leut/Der Glaser

Der Glaser

Der Glaser macht a Scheib wo nein,
"No sachte", sait er, "des hot's glei.
Mer därf's no könna, sodale!
Wia? witt net heba, des wär schön!"
Do fallt em richtig 's Fensterglas.
Vom Rahma raus g'rad uf sein Nas.
Jetz packt er's wüatich an ond druckt
Ond klopft ond wettrat wia verruckt.
Ond wia-n-er meint, jetzt häb er's g'richt't,
No fallt's am wieder raus ens G'sicht.
Jetz schnupft er z'erschta, so daß's batt't,
No nemmt er d'Scheib' so recht ak'rat
Ond schiabt se recht subdil leicht nein.
Ond wuppdich ischt se drenna g'sein.
"Gelt", lacht er, "wia-n-i glei g'sait haun,
So goht es, spielend muaß es gaun."