Text:Otto Gittinger/So semmer Leut/A Held

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

A Held

Rengs rom send lauter Kreuz' von Holz,
Dermitta dren stoht grauß ond stolz
A Grabstein, der ischt nobel g'richt't
Ond henta druf stoht des Gedicht:
"Geschmückt mit ehrenvollen Wunden,
Hat hier ein Held sein Grab gefunden."
Do leit a Held, nach Frankreich nein
Ist er mitg'fahra mit am Train,
Amol bloß hot er's höra knalla,
No ischt er schiar vom Waga g'falla,
Derheim git's Sprüch von Muat ond Bluat,
Zom Schaffa, meint er, sei-n-er z'guat.
Des ischt a Held, am Schnapsglas dran,
Do stellt er vornaweg sein Man.
Em Mauluffsperra-n-ond em Fluacha,
Kanscht lang noch seinesgleicha suacha.
Des ischt a Held, wo Weib ond Kend
kein Tag vor Prügel sicher send,
Er jagt mit lauter Heldastuck
Sein eigne G'sondheit zom Guguk.
Ond wia-n-er endlich ab ischt g'reist,
No ischt sein Weib samt ehm erlaist.
Se hot am gern den Grabstein g'stift't,
Ond no vergolda laun dia Schrift:
"Geschmückt mit ehrenvollen Wunden,
hat hier ein Held sein Grab gefunden."