Team Stuttgart

S Team Stuttgart isch e Radsport-Mannschaft gsi, wu anne 1989 vum Stuegerter Winfried Holtmann grindet woren isch un 1991 im Team Telekom ufgangen isch.

Gschicht

S Team Stuttgart isch dr dritt Versuech gsi z Dytschland e Profi-Radsport-Mannschaft ufzböue noch em rokado-Team (bis 1976) un em Kotter Racing Team, wu s vu 1980 bis 1982 gee het.

Dr Holtmann, wu Chefredakteur vu dr Sindelfinger Zeitung gsi isch, het syt 1971 Profi-Radränne z Bade-Wirttebärg organisiert, z. B. het er 1984 mit em Hofbräu-Sechs-Tage-Rennen s Stuegerter Segs-Däg-Ränne wider in s Läbe gruefe. 1987 het er d Tour de France in d Stadt brocht, Stuegert isch Ziilort vu dr dritte Etappe gsi un Startort vu dr vierte.

Sponsore vum Team Stuttgart sin näbe dr Stadt Stuegert Daimler-Benz, d Fahrrad-Firma vum Eddy Merckx un s Frankfurter Versandhuus Brügelmann gsi. Dr Etat isch bi rund 2 Millione D-Mark im Johr gläge.

Bekannti Fahrer vum Team Stuttgart sin dr Udo Bölts, dr Bernd Gröne, dr Darius Kaiser, dr Bernhard Rassinger, dr Ad Wijnands, dr Dean Woods un dr Werner Wüller gsi. Sportligi Leiter sin dr Hennie Kuiper (1989/1990) un dr Werner Stauff (1990) gsi,

Di greschte Siig sin zweimol di dytsch Meischterschaft im Stroßeränne gsi (1989: Darius Kaiser, 1990: Udo Bölts), dr Siig bi dr Driedaagse van De Panne dur dr Erwin Nijboer un dr Gwinn vu dr vierte Etappe vu dr Vuelta a España 1990 dur dr Nijboer.

Aafangs 1991 isch s Team Stuttgart schließli ibernuu wore vum neje Hauptsponsor Deutsche Telekom un isch in Team Telekom ungnännt wore. Fascht di gsamt Mannschaft vu 1990 isch in s nej Team Telekom ibernuu wore, nume dr Jochen Görgen, dr Kees Hopmans, dr Ralph Moorman, dr Uwe Nepp un dr Ludo Peeters hän kei Verdrag iberchuu, zem Deil hän si ufgehrt mit em Radsport (Moorman, Peters), zem Deil sin si zue andere Teams gange (Görgen, Hopmans, Nepp).

Dr Holtmann isch no langi Zyt Team-Manager vum Team Telekom gsi, 2003 isch er noch eme Härzinfarkt gstorbe.