Tatort: Rot – rot – tot

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Filmdate
Dütsche TitelTatort: Rot – rot – tot
OriginaltitelTatort: Rot – rot – tot
ProduktionslandDeitschland
OriginalsproochDeitsch
Erschiinigsjoor1978
Lengi90 Minute
Stab
RegieTheo Mezger
DräibuechKarl Heinz Willschrei
ProduktionWerner Sommer fir da Siddeitscha Rundfunk
KameraJustus Pankau
Bsetzig
  • dr Werner Schumacher als Kriminalhauptkommissar Eugen Lutz
  • dr Frank Strecker als deam sei Assischdent Wagner
  • dr Curd Jürgens als Konrad Pfandler
  • d Renate Schroeter als sellem sei Frau Julia
  • dr Christian Berkel als Uwe Pfandler
  • dr Robert Freitag als Professor Wilke
  • d Elke Twiesselmann als Evelyn Wilke
  • d Christiane Pauli als Frau Grote
  • d Karin Schlemmer als Frau Bär
  • dr Wolfgang Hepp als Herr Brinkmann
  • dr Siegmar Schneider als Eugen Pretorius
  • d Christiane Timerding als Apodekere
  • d Regine Vergeen als Inge Ritter
  • dr Gerhard Dressel als Klaus Gierke
  • dr Kurt Wendolin als Arzt
Dialäkt: Schwäbisch

Tatort: Rot – rot – tot ischt a deitscher Fernsehfilm us dr Krimi-Reihe „Tatort“ us-em Jôhr 1977 vom Reschisseer Theo Mezger. S Drehbuech vorfasst hôt dr Karl Heinz Willschrei. Uruffgfihrt wôrra isch der Film am 1. Januar 1978 em Erschda Programm vo dr ARD. Dô drbei hôt der Stroifa a Eischaltquode vo 65 % ghet.

Handlong[ändere | Quälltäxt bearbeite]

Dr Vorsicherongs-Mademadiker Konrad Pfandler wohnt mit seira wesentlich jengera zwoida Frau Julia ond seim Soh us erschder Ehe en-ra Villa em vornehma Stuegerter Stadtdoil Killesberg. Weil’r en seim fortgschriddena Alder d Julia nemme en jedra Hinsicht zfriidastella kôô, nemmt’r ihre Seidaschbreng mit jonge Manna billigend en Kauf. Em Pfandler sei Soh Uwe leidet ondr dr ibrgraußa Persendlichkeit vo seim Vadder ond schbricht deshalb vorsterkt em Alkohol zua.

Mit dr Zeit krenket da Pfandler aber doch dia Haufa Eskapada vo seira Frau ond des viile Alloisei. Drom fasst’r da Entschluss, des Weib omzubrenga. Damit-em hendrher d Polezei et uff d Schliche komma soll, fasst’r an ganz absurda Plôô: Weil d Julia raude Hôôr hôt, erdrosslet’r zonägscht en kurze zeitliche Abstend zwoi zuafellich ausgwehlde jonge Fraua mit dr gleicha Hôôrfarb. Uff dui Weis will’r d Kribo uff-na falscha Schbur brenga. Zonägscht siht’s au so aus, als kennt’r dô drmit Erfolg han. Dr Kriminalhauptkommissar (KHK) Lutz ond sei Assischdent Wagner, wo dia Vorbrecha uffklära sollet, tippet uff-na Mordserie, wo‘s a Triib-Täter geziilt uff raudhôôrige Fraua abgseha hôt. Dr Vordacht fellt uff da jonga Uwe Pfandler. Aber bald stellt sich’s raus, dass dr sell et dr Merder sei kôô.

Om sei Frau en d Roih vo de Opfer zo brenga, will se dr Pfandler nachts en da Park vom Killesberg locka. Dô drbei gôht’r so vôr: Er ruaft se ôô ond erklärt-ra, er häb bei-ma Schbaziirgang sein Fuaß vorstaucht, se meeg-en doch an dr beschriibena Stell abhola. Kaum ischt-se deet ôôkomma, wuud se vo ihrem Môô erdrosslet. Jetzt aber macht’r an ganz entscheidenda Fehler: aus Angscht vôr deam Seria-Merder hôt sich d Julia nemlich a schwarza Perick uffgsetzt. Dui reißt’r-a raa, nemmt se mit ond vorgreebt se en seim Garda. Wia dr KHK Lutz mit seim Assischdenda beim Pfandler uffdauchet, sehet se, wia em sella sei Hond em Garda an-ra beschdemmda Stell wenslet ond gräbt. Dô drbei stoßet dia Kriminalbeamde uff dr Julia ihr Perick ond kennet uff dui Weis da Pfandler als Merder ibrfihra. Der siht koin Ausweag meh fir s Weiderleaba ond vorschiaßt sich en seim Arbeitszemmer.

Au des muaß noh erwehnt werra[ändere | Quälltäxt bearbeite]

D Ussa-Uffnahma send an de Stuegerter Originalschaublätz dreht wôrra ond d Ennauffnahma en de Studios vom Siddeitscha Rundfunk. Bei seira Fernseh-Premiere am Nuijôhrsdag 1978 hend dean Tatort 26,57 Milliona Zuaschauer ôôgucket, was ema Marktôôdoil vo 65 % entschbricht. Dô drmit isch dui Tatort-Folga de erfolgreichscht, wo bisher ausgschdrahlt wôrra ischt, ond s gheert et viil drzua zo behaupta, dass so a Quode bei dr Viilzahl vo de heidige Programm nia meh erreicht werra kôô.[1]

Weblink[ändere | Quälltäxt bearbeite]

Oinzlne Nôchweis[ändere | Quälltäxt bearbeite]

  1. "Rot - rot - tot": Der Rekord-"Tatort" beim SWR Artikl uf digitalfernsehen.de vom 27. Dezember 2011
Information icon.svg Dä Artikel basiert uff ere fräie Übersetzig vu dere Version vum Artikel „Tatort:_Rot_–_rot_–_tot“ vu de dütsche Wikipedia.

E Liste vu de Autore un Versione isch do z finde.