Chacheli

es Chacheli vo Ängland

Es Chacheli isch es Gfäss zum öpis druus trinke.

Die meischte Chacheli sind us Cheramik. Es isch eini vo den eifachschte Forme, wo dr Chachler – das isch im Hochdüütsch dr Töpfer – us em Toon macht, und me cha se au als e chlyni Schaalen aaluege. Früener het me Chacheli au vom Drächsler us Holz lo mache. I dr nöiere Zyt git s Chacheli au us vil anderne Materialie, öppn us Glas, Bläch und Plastigg.

Me hebt s Chacheli eifach zwüsche beede Händ zum s uuflüpfen und druus trinke.

A de bessere Chacheli het s en chlyne Hänkel, ass me se gäbig mit einere Hand cha uuflüpfe. Dr nöier Naame für die Gfäss mit emene Hebi isch Tassli. Das Wort könnt men im Düütsche sit em 16. Joorhundert, womes as Leenwort usem Französischen übernoo het.

S schwyzerdüütsche Wort Chachle het me früener algemein für verschideni Cheramikgfäss bruucht, wie me bim Schwyzerischen Idiotikon gseet.

Im Öschtrychische seit men zu däne Gfäss au Häferl; im Schwyzerdüütsche isch es Häfeli aber meischtens a chlyni Channe.

Wemmen es Chacheli odr au es anders Cheramikgfäss vrbricht, goot me zum Chacheliflicker, wo s wider ganz macht. Wie die fyni Arbet vom Chacheliflicker goot, het dr Simon Gfeller uf bärndüütsch beschribe.

Weblink

 Commons: Tasse – Sammlig vo Multimediadateie

• Schweizerisches Idiotikon: Chachleⁿ, Chacheleⁿ, Chachtleⁿ , Bd. 3, Sp. 118 ff.; Tasseⁿ, Tatzeⁿ I, Bd. 13, Sp. 1746 ff.