Steffi Lemke

d Steffi Lemke (2014)

D Steffi Lemke (* 19. Jänner 1968 z Dessau) isch e dytschi Bolitikeri (Bindnis 90/Di Griene) un Diplomagraringenieuri. Syt em 8. Dezämber 2021 isch si Bundesminischteri fir Umwält, Naturschutz, nukleari Sicherhait un Verbruucherschutz im Kabinett Scholz.

Vu 1994 bis 2002 un syt 2013 isch si Mitglid vum Dytsche Bundesdag. Si isch vu 2002 bis 2013 au bolitischi Bundesgschäftsfiereri vu ire Bartei gsii.

Lääbe un Beruef

Noch em Bsuech vun ere Polytächnische Oberschuel z Dessau het d Steffi Lemke vu 1984 bis 1986 Zootächnikeri gleert. Derno het si vu 1986 bis 1988 as Boschtleri gschafft. Dernäbe het si ne Abiturlehrgang am Philanthropinum Dessau gmacht. Noch em Abitur 1988 het si Agrarwisseschaft an dr Humboldt-Uniwersidet Berlin studiert un 1993 as Diplom-Agraringenieuri (Fachrichtig Dierproduktion) abgschlosse.

D Lemke isch Mueter vun eme Chind.

Bolitischi Laufbahn

Bartei

d Steffi Lemke uf dr BDK z Kiel 2011

D Steffi Lemke het anne 1989 zue dr Mitgrinder*ne vu dr Griene Bartei in dr DDR ghert. Vu 1993 bis 1994 het si em Griene-Landesvorstand u Sagse-Anhalt aaghert.

Vu 2002 bis 2013 isch d Steffi Lemke Bolitischi Bundesgschäftsfiereri vu Bindnis 90/Di Griene gsii. Dodermit isch si di dienschteltscht Generalsekreteri bzw. Bolitische Gschäftsfiereri vu dr im Dytsche Bundesdag verdrättene Barteie gsii. Si isch 2004 ohni Gegekandidatur, 2006 gege d Kandidatur vu dr Kirsten Böttner mit iber 2/3 vu dr Stimme, 2008 mit knapp 84 % widergwehlt wore; 2010 het si 82 % vu dr Stimme kriegt, 2012 83 %. No dr Bundesdagswahl 2013, wu d Lemke wider in Bundesdag gwehlt woren isch, isch dr ganz Bundesvorstand vu dr Griene zurugdrätte. Noch em Barteistatut derfe nume je zwai Mitglider vum Bundesvorstand in Barlemänt sitze (Satzig vum Bundesverband, § 15, Absatz 4). Mit em Cem Özdemir, dr Claudia Roth un dr Astrid Rothe-Beinlich het des no dr Bundesdagswahl uf vier Mitglider vum Bundesvorstand zuedroffe. D Lemke het zerscht uffig gloo, eb si fir dr Barteivorsitz wett kandidiere, si het si aber derno dergege entschide.

Abgordneti

Vu 1994 bis 2002 isch d Steffi Lemke scho Mitglid vum Dytsche Bundesdag gsii. Doderby isch si alliwyl iber d Landeslischt Sagse-Anhalt in Bundesdag yyzoge. Vu 1998 bis 2002 isch si Barlemäntarischi Gschäftsfiereri vu dr Bundesdagsfraktion Bindnis 90/Di Griene gsii.

Dr Barteidag vu Bindnis 90/Di Griene z Sagse-Anhalt het d Lemke am 13. Oktober 2012 mit 63 vu 73 Stimme (86,3 %) zur Spitzekandidati uf Blatz 1 vu dr Landeslischt zur Bundesdagswahl 2013 gwehlt. No drei Wahlperiode isch si wider in Bundesdag yyzoge. D Steffi Lemke isch oredli Mitglid un Obfrau im Uusschuss fir Umwält, Naturschutz, Böu un Reaktorsicherheit. Si ghert derzue as ordeli Mitglid em Elteschterot aa un isch stellverdrättend Mitglid im Uusschuss fir Ernehrig un Landwirtschaft un im Uusschuss fir Wahlbriefig, Immunidet un Gschäftsornig.

Syter 2013 isch d Steffi Lemke aini vu vier Barlemäntarische Gschäftsfierer*ne vu dr Bundesdagsfraktion vu Bindnis 90/Di Griene.

Weblink

 Commons: Steffi Lemke – Sammlig vo Multimediadateie

• Websyte vu dr Steffi Lemke
• d Steffi Lemke uf dr Websyte vu dr Bundestagsfraktion vu Bindnis 90/Di Griene
• Biographie beim Deutschen Bundestag
• Tilo Jung: Steffi Lemke (Bündnis 90/Die Grünen) Jung & Naiv Folge 458, 8. Merz 2020 (Interview, 131 min)

Fueßnote

Dä Artikel basiert uff ere fräie Übersetzig vu dere Version vum Artikel „Steffi_Lemke“ vu de dütsche Wikipedia. E Liste vu de Autore un Versione isch do z finde.