Skotinger

D Skotinger (lat. Scotingi, Scutingi) sind e germanische Stamm gsii, wo im Jura südöstlich vo Besançon im Tal vom Ain glebt hend.

D Skotinger sind im 6. Joorhundert zäme mit de Warasker dör di Burgundisch Pforte is Tal vom Doubs gfale und hend sich im Jura niderloo. Si sind denn is Riich vo de Burgunder iiglideret wore und hend e Gaugroofschaft bildet, wo ane 603 zerstmol as pagus Scotingorum vom fränkische Historiker Fredegar gnennt werd und bis is 12. Joorhundert bistande het. De Name vom Gau isch hüt no im Landschaftsname Escuens im Franche-Comté erhalte.

De Ort Salins-les-Bains im französische Jura, dozmool e wichtige Ort för Salzgwünig, isch im Piet vo de Skutinger glege.

De germanisch Name stoot zum Verb schüüsse und dörft sich drum uf d Biwaffnig vo de Skotinger as »Schüsser, Schütze, Schlüderer« bizüche.

Büecher

• Reallexikon der Germanischen Altertumskunde: »Scutingi«.