Credit Suisse Group

Credit Suisse Group AG
Logo
Staat	Schwiz
Rächtsform	Aktiegsellschaft
ISIN	CH0012138530
BIC	4866
Gründig	1997 (5. Juli 1856)
Sitz vom Undernähme	Züri
Gschäftsdate 2020
Bilanzsumme	CHF 805,8 Mrd.
Mitarbeiter	48’770
Leitig
Leitig vom Undernähme	Ulrich Körner (Vorsitzender vo dr Gschäftsläitig) Axel P. Lehmann (VR-Präsident)
Website	www.credit-suisse.com

Hauptsitz am Paradeplatz z Züri

Die SKA 1895

1760: Dr Fäldhof an dr Stell vom Credit Suisse. Rächts dr Fröschegrabe

D Credit Suisse Group AG (CS) – früehner Schweizerische Kreditanstalt SKA – isch eins vo de grösste wältwiite Finanzdienstleistigsundernähme und het si Hauptsitz z Züri. S äigetlich Bankgschäft macht d Tochtergsellschaft Credit Suisse AG und s schwiizerisch Gschäft sit em Novämber 2016 d Credit Suisse (Schweiz) AG.

Gschicht

Di Schwiizerisch Kreditaastalt isch 1856 vom Zürcher Wirtschaftsmaa und Politiker Alfred Äscher ggründet woorde, zum der Isebaanbou chöne finanziere. Mit dère Bank isch Züri naadisnaa zum Wirtschaftszäntrum vo de Schwiiz woorde.

1982 isch d CS Holding gschaffe woorde, wo di verschidene Bitäiligunge vo de Schwiizerische Kreditaastallt zämegfasst hät, drunder di amerikaanisch Bank First Boston z Nöi-York. 1989 isch d Kreditaastallt as Tochter i d CS Holding integriert woorde. 1990 hät d Kreditaastallt d Bank Leu und 1993 die Schwiizerisch Volksbank übernaa. 1997 sind d CS Holding und d Versicherigsgsellschaft Winterthur en Alianz iiggangen und händ d Credit Suisse Group ggründet (2006 isch d Winterthur dän aber a d AXA-Gruppe verchaufft woorde). Nach ere Nöiorganisazioon, wo d Kreditaastallt al iri Töchteren integriert hät, isch si ab em Jänner 2006 nöi under em äinzige Maarggename Credit Suisse uufträtte, as globaali Bank mit drei Gschäftsbiräich: Investment Banking, Private Banking, Immobilienmanagement. Sit doo isch de Name Schwiizerischi Kreditaastallt Vergangehäit gsii.

Nach ere schwèère Kriise hät mer am 19. Mèèrz 2023 bikannt ggèè, dass d Konkurräntin UBS d Credit Suisse im Lauff vom Jaar 2023 übernäm. De Bundesraat hät de Chauff vermittlet und per Nooträcht e Finanzgarantii vo 9 Milliarde Franke paraatgstellt. Am 31. Augschte 2023 hät der UBS-Scheff Sergio Ermotti in ere Prässekomferänz mittäilt, das d CS bis änds 2024 vollständig i d UBS sel integriert wèèrde. Wüntsch vo verschidener Siite, der Inlandtäil vo der CS seli doch sälbständig bliibe, so das es au i Zuekumft i de Schwiiz mee weder nu äi Groossbank gäb, sind daademit Makulatuur woorde.

Undernähme

Dr Credit Suisse beschäftigt as Grossbank wältwit öbbe 50'500 Mitarbeiter, drvo öbbe 21'000 in dr Schwiiz (Stand Septämber 2010). S Undernähme isch in d Sparte Investment Banking, Private Banking und Vermögnsverwaltig iideilt. Am Ändi vo 2009 het dr Credit Suisse e Bilanzsumme vo 1'031,4 Milliarde Schwiizer Franke und e Reingwünn vo 6,411 Milliarde Franke usgwiise. D Kundevermöge hai sich uf 1'406,2 Milliarde Franke beloffe. CEO vo dr Credit Suisse Group isch dr Tidjane Thiam, Presidänt vom Verwaltigsroot isch sit em 29. April 2011 dr Urs Rohner.

D Aktie vom Credit Suisse (CSGN) si an dr Schwiizer Börse SIX Swiss Exchange und as American Depositary Share (CS) an dr New York Stock Exchange (NYSE) kotiert.

Dr Credit Suisse isch as Universalbank in de Beriiche Investment Banking, Private Banking und Vermögensverwaltig (Asset Management) dätig. Zur Credit Suisse Gruppe ghöre under anderem de Privatbank Clariden Leu, die Neue Aargauer Bank und d Bank-now, wo uf Privatkredit und Leasing spezialisiert isch. Drüber us isch d Credit Suisse Group mit dr Dochtergsellschaft Wincasa im Immobilieberiich dätig.

Litratur

• M. Esslinger: Geschichte der Schweizerischen Kreditanstalt während der ersten 50 Jahre ihres Bestehens. Orell Füssli, Mai 1907. 
• Joseph Jung: Von der Schweizerischen Kreditanstalt zur Credit Suisse Group. Eine Bankengeschichte. 2. Auflage. NZZ Verlag, 2000. 

Weblingg

 Commons: Credit Suisse Group – Sammlig vo Multimediadateie

• Website vo dr Credit Suisse