S Gundeldinger Schlössli

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
S Gundeldinger Schlössli
Dialäkt: Baseldütsch
S Undere Middlere Gundeldinge 1754

S Gundeldinger Schlössli isch e chliises Schlössli an dr Gundeldingerstrooss 280 im Gundeli z Baasel. Es isch e zwäistöckigs Fachwärkhuus und lang dr Landsitz vo meebessere Baasler gsi, under anderem vom Thomas Platter und häisst dorum hüte au Thomas Platter Huus.

S Schlössli ghöört zu de Kulturgüeter im Kanton Baasel-Stadt, wo nazionali Bedütig häi.

Gschicht[ändere | Quälltäxt bearbeite]

S Schlössli isch im 14. Joorhundert as Wejerschlössli vor dr Stadtmuure im ländlige Gundeli entstande und het emol s Undere Middlere Gundeldinge ghäisse. Vo 1549 bis 1582 het s im Thomas Platter ghöört, wo am liebste dört gwoont het. Si Soon Felix het s Schlössli gerbt und spööter verkauft. Vo denn aa isch s in de Händ vo riiche Kauflüt und hooche Baasler Amtspersone gsi. Im Joor 1842 häi s d Erbe vom Samuel Hartmann im Bürgerspidaal verchauft, und das het d Liigeschaft bis 1958 bsässe und d Milch, wo d Chüe vom Schlössli gliiferet häi, dä Baziänte serwiert.

In de 1960er Joor isch s Aawääse aber scho seer verlodderet gsi, und mä het sich überlegt, öb mä s nid söll abrisse. E Grubbe vo Häimetschützer mit dr Understützig vom Allgemäine Konsumveräin Coop het s Schlössli aber chönne rette. D "Stifdig Thomas Platter Huus" het s Schlössli denn vo dusse und vo dinne bis 1974 lo renowiere. Denn isch s Rektorat vo dr Brimarschuel Groossbaasel-Ost iizooge und het bis zum Früelig 2006 dört si Sitz ghaa. Im oobere Stock isch s Unfalldezernat vo dr Staatsaawaltschaft Baasel-Stadt dehäi gsi. Im Bardeer isch hüte e therapöitischi Braxis.

Im Gundeli het s emol vier Schlössli ge, übrig si no zwäi, s Thomas Platter Huus und s Schlössli Vorders Gundeldinge.

Kwelle[ändere | Quälltäxt bearbeite]

Weblingg[ändere | Quälltäxt bearbeite]

47.5399447.592092Koordinate 47° 32′ 24″ N, 7° 35′ 32″ O; CH1903: 611555 / 265480