Schillinger Verlag
D Karl Schillinger Verlag isch e Verlag fir Regionalliteratur z Fryburg gsii.
dr Verlag
[ändere | Quälltäxt bearbeite]Dr Schillinger Verlag goht zrugg uf e Druckerei, wu dr Karl Schillinger anne 1899 z Fryburg grindet ghaa het. Anne 1908 het dr Schillinger au ne Verlag derzue grindet, wu unter anderem d „Stadion-Zeitung“ vum Fryburger FC, d „Süddeutsche Sportzeitung“ oder d „Schmiede und Wagenbauer Zeitschrift“ uusegee het. Mit em Aafang vum Erschte Wältchrieg anne 1914 het dr Karl Schillinger d Verlagsarbet ufgee. Är isch anne 1917 im Erschte Wältchrieg bi Verdun gfalle.
Syni Sihn, Karl un Hermann, wu bim Vater Schriftsetzer glehrt ghaa hän, hän d Druckerei wytergfiert. Dr Karl isch anne 1962 gstorbe, dr Hermann Schillinger isch anne 1978 us em Gschäft uusgschide.
Derno het dr eltscht Suhn vum Hermann, dr Wolfgang Schillinger, dr Bedrib ibernuu. Är het bis 1955 im aigene Huus Schriftsetzer glehrt ghaa un isch derno uf Stuegert go Praxiserfahrige sammle. Vu 1956 bis 1959 het er an dr Akademy fir s grafisch Gwärb z Minche studiert un dert s Abschlussdiplom un dr Maischter gmacht. Derno het er e baar Johr lang in verschidene Stedt Beruefserfahrige gsammlet, unter anderem in Druckereie z Aschaffenburg as tächnische Bedribslaiter un z Düsseldorf as Verdribslaiter. Anne 1962 isch er retuurchuu uf Fryburg un het in dr Familiedruckerei wider aafange schaffe.
In dr Zyt vum Wirtschaftswunder noch em Chrieg het d Schillinger Druckerei unter anderem Katalog fir d Firma „WehraTeppiche“ druckt, wu hochi Aaforderige an d Farbe gstellt ghaa hän. Die Erfahrige hän speter ghulfe bim Drucke vu Bildbänd.
Ab 1971 het dr Schillinger derno aagfange au Biecher im aigene Verlag drucke. Ab 1972 het dr Karl Schillinger Verlag e Verbund mit dr Buchdruckerei Schillinger bildet. Anne 1984 isch dr Verlag us em Firmeverband uuseglest wore un isch syterhär e aigeständigi GmbH im Familiebsitz gsii. D Druckerei het s no bis 1989 gee.
S Brogramm vum Buechverlag het Belletrischtik, Sachbiecher un Bildbänd mit eme Schwärpunkt uf d Region am Oberrhyy umfasst. Au verschideni Biecher uf Alemannisch sin im Schillinger Verlag uusechuu, z. B. s „Taschenwörterbuch“ vum Hubert Baum, s „Alemannische Dialekthandbuch“ vum Harald Noth oder s „Opfinger Wörterbuch“ vum Jürgen Sutter un anderi. Derzue het mer bim Schillinger Verlag au privati Sache chenne drucke loo wie Familiechronike usw.
Wu dr Wolfgang Schillinger in Ruestand gangen isch un kai Noofolger gfunde het, het dr Schillinger Verlag aafangs 2023 alli Gschäft yygstellt.
Weblink
[ändere | Quälltäxt bearbeite]- Websyte vum Schillinger Verlag (Archviversion vum 10.12.2022; Websyte isch mittlerwyli offline)
- Joachim Rumpf: Wolfgang Schillinger uf salpeter.net