Dr Sarganserländer isch a Schwiizer Regionalzitig mit em Redaktionssitz ds Mels.
Dr Sarganserländer isch ds einzige regionale Nachrichteblatt vu dr Region Sargaserland und eine vu de eltischte Zitige vu dr Schwiiz. D Druggi findet me im Rhiintalische Haag. Dr Sarganserländer würd jede Tag druggt. Jede Dsiischtig würd er zue dem als Grossuuflag mit rund 19'000 Exemplar ad Bewohner vum Sarganserland zuegschiggt. Dr jetzig Chefredaktor isch dr Heinz Gmür, dr Verwaltigsratspräsident vum Unternehme isch dr Paul Frei.
In konservative Kreis vum damalige katholische Bezirk Sargans hett mes meh und meh als störend empfunda, dass es in dr Presselandschaft nebem liberal-orientierte Oberländer Ahzeiger uf konservativer Site kais Gegegwicht geh hett. Dr Oberländer Ahzeiger hett bis zum Erschine vum Sarganserländer fascht nüün Johr sis politisches Gedankeguet chönne drugge. De Gründig vom Sarganserländer isch im März 1873 e Versammlig vom katholische Männer- und Piusverein voruusgange. Am 30. Dezember 1874 isch de Sarganserländer vom katholische Männerverein als „siis“ Organ gründet und am 2. Januar 1875 isch schliesslich die ersti Uusgob veröffentlicht worde. De Sarganserländer isch jewils am Mittwoch und Samstig erschine.
