SEX

Us der alemannische Wikipedia, der freie Dialäkt-Enzyklopedy
Dä Artikel behandlet s literarische Wärk vo der Künstlerin Madonna. Zum Thema Sexualität lueg Sex.

SEX isch der Titel vom ene Bildband über d Künstlerin Madonna mit erotische Fotografie vom Steven Meisel. Für d Gstaltig isch der renommierti Designer Glenn O’Brien zueständig. D Text het d Madonna sälber verfasst.

D Veröffentlichung vom Buech am 21. Oktober 1992 het wältwiit für e plante Skandal gsorgt: D Madonna, wo as Sängere sehr erfolgriich isch, het e Buech veröffentlicht, wo d Gränze zur Pornografii berüehrt und uf sadomasochistische Konzept ufbaut isch. Wäge däm isch s Buech in vile Länder verbote worde. S Buech isch wältwiit 1,5 Millione mol verchauft worde und isch eso s erfolgriichste Coffee Table Book, wo s je ge het.