Richard Calini
| Dialäkt: Baseldütsch |
Dr Richard Calini (* 9. Februar 1882 z Züüri; † 19. April 1943 z Baasel) isch e Schwizer Archidekt und Baasler Politiker gsi.
Dr Richard Calini isch 1882 z Züüri uf d Wält choo. Er isch uf d Gwärbschuel Züüri gange, het denn am Technikum z Winterthur und an dr Technische Hochschuel z Karlsrue bim Schäfer, Ratzel und Läuger studiert. Er het e Muurer- und Zimmermaabraxis gmacht und het d Bauläitig bi dr Restaurierig vom ene Schloss im Piemont ghaa. Noch ere Studieräis dur Italie het er im Büro Pfiegehard u. Häfeli z Züri afo schaffe. Vo 1906 bis 1910 isch er Büroschef bi Alfred Romang gsi. 1910 isch er Partner in dr Firma Widmer und Erlacher worde, wo vo denn a Widmer, Erlacher und Calini ghäisse het.
Dr Calini isch Mitgliid vo dr Freisinnig-Demokratische Bardei gsi und isch 1920–1923, 1929–1935 und 1938–1941 im Baasler Groosse Root gsässe. Vo 1923 bis 1925 isch er Regierigsroot gsi und het s Baudepartemänt gläitet.