Varronische Ära
| Dialäkt: Markgräflerisch (Ebringe) |
Di Varronisch Ära heisst d Johreszellig oder Epoche sit dr Gründig vu dr Stadt Rom (lat. ab urbe condita, oder au anno urbis conditae („im Johr sit dr Stadtgründig“) abchürzt a. u. c.
S Datum vu dr Gründig isch vum römische Historiker Marcus Terentius Varro uf dr 21. April 753 v. Chr. zruckgrechnet worre. Datsächlich schint aber d Stadt Rom mindistens 300 Johr älder z'si.
Verwendig
[ändere | Quälltäxt bearbeite]Ob die Varronisch Zellig in dr Antike iberhaupt zuer Johresagab verwendet worre isch, isch umstritte. D Römer hän zue dr Bezeichnig vu dr Johre d'Agab vu dr amtierende Konsuln verwendet, im Oste vum Riich sin zahlriichi Äre, z. B. die Seleukidisch Ära, verbreitet gsi, später isch die Diokletianisch Ära in Gebruuch chu, wo schliessli im Weste vu dr christliche Johreszellig (Anno Domini) abglöst worre isch.
Vu Bedütig isch die Varronisch Ära in dr Antike fer d'Abhaltig vu dr Säkularfire gsi, also dr Johrhundertfire vu dr legendäre Gründig vu Rom, wo erstmols underem Kaiser Claudius anno (domini) 47 (800-Johr-Fir) abghalde worre sin. Anno 147/148 het dr Antoninus Pius s 900jährige Jubiläum gfirt un s Millenium het no underem Philippus Arabs anno 248 stattgfunde.
Zue dr Agab vu Johre isch d Zellig ab urbe condita erst im Middelalder verbreitet gsi. Die varronisch Zittrechnig isch dur die Christlich Ära, wo vum Mönch Dionysius Exiguus anno 525 vorgschlage worre isch, abglöst worre, aber wohl nit vor em achte Johrhundert.
Umrechnig
[ändere | Quälltäxt bearbeite]Wil s Johr Null in dr historische Christliche Ära fählt, wird wie folgt umgrechnet
- Fir Johr bis 753 a.u.c. inklusiv wird d Johresagab vu 754 abzoge.
- Fir Johr ab 754 a.u.c. wird vu dr Johresagab 753 abzoge.
Bispile: 245 a.u.c. isch 754-245 = 509 v. Chr (Gründig vu dr Republik). 800 a.u.c. isch 800-753 = 47 n. Chr.
Alternativi Johreszellige
[ändere | Quälltäxt bearbeite]Seltener isch die catonisch oder au capitolinisch Zellig agwendet worre, wo vum Marcus Portius Cato begründet worde isch, und wo d Stadtgründig uf s'erst Johr vu dr 7. Olympiade glegt het (752 v. Chr.).
Witteri antiki Agabe zuer Stadtgründig stamme vum Hellanikos vu Lesbos (säller datiert si uf 1180 v. Chr.), Timaios von Tauromenium (814 v. Chr), Eusebios Hieronimus (755 v. Chr.), Polybios (751 v. Chr.); Fabius Pictor (748 v. Chr.) un Cincius Alimentus (729 v. Chr.).