Pierre Yoyotte

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Dr Pierre Yoyotte (uf d Wält cho noch 1900, gstorbe 1940) isch e Surrealist gsi.

Er isch uf Martinique uf d Wält choo. Gstudiert het er an dr Sorbonne z Bariis. Wie si Schwöster, d Dichdere Simone Yoyotte (öbbe 1910-1933), het er zur Surrealistegrubbe um e André Breton ghöört. Er het zwar die antikolonialistischi Schrift Humanitarisme meurtrier wie die andere Surrealiste underschriibe, het aber nid zur antikolonialistische Grubbe Légitime défense ghöört, im Geegesatz zu siner Schwöster. 1933 het er in dr fümfte Nummere vo dr Zitschrift Le surréalisme au service de la révolution e fenomenologischi Analüse veröffentligt under em Ditel «Théorie de la fontaine», wo de Ideä vom Salvador Dalí gäänelet het. Däm isch er zu deere Zit noochgstande und wo dr Breton 1934 dr Dalí us dr Grubbe het welle usschliesse, isch dr Yoyotte dr äinzig gsi, wo nid drfüür gstimmt het. Anderi Schrifte vom Yoyotte si marxistisch und freudianisch, wie si Essei über die antifaschistischi Bedütig vom Surrealismus in Documents 34.

1939 het er sich freiwillig zur franzöösische Armee gmäldet und isch Korporaal in de Kolonialdrubbe worde. Er isch 1940 uf ere Erkundigsmissioon umchoo.

Kwelle[ändere | Quälltäxt bearbeite]

  • Franklin Rosemont, Robin D. G. Kelley, Black, brown, & beige: surrealist writings from Africa and the diaspora, University of Texas Press 2009, S. 40f