Peter Emil Huber-Werdmüller

Dr Peter Emil Hueber-Werdmüller (* 24. Dezämber 1836 z Züri; † 4. Oktober 1915 au döört) isch e Schwiizer Fabrikant gsi.

sis Läbe und Schaffe

S Grab vom Huber-Werdmüller uf em Friidhoof Änzebüel z Züri

Er isch dr Soon vom Johann Rudolf Hueber gsi, wo z Züri mit Syde gschäftet het. Er het am Poly und z Paris Maschinenbau studiert und isch e Zyt lang uf Ängland ggange zum döört d Induschtry leere könne. 1864 het er d Anna Marie Werdmüller ghürootet.

Drno het dr Peter Hueber z Winterthur bi dr Sulzer und dänn bi dr Escher, Wyss & Cie. z Züri gschaffet. Ane 1863 het er z Öörlike d Güüsserei P. E. Huber & Co. ygrichtet, won er aber scho vier Joor spöter an en Oschtschwiizer Firma vrchauft het. Und 1876 het dr Hueber-Werdmüller nomol ghulfe z Öörlike e Fabrigg uf d Bei z stelle, d Wäärchzüüg- und Maschinefabrigg Öörlike. Won er 1884 i däm Betriib au en elektrischi Abtäilig ufbout het, isch dr Charles Brown dere iire Scheff woorde. Mit däm Gschäft het em Hueber sini Fabrigg öiropäischi Induschtrygschicht gschribe.

Zäme mit em Georg Robert Neher vo Schaffuuse und em Gustave Naville vo dr Escher, Wyss & Cie. isch dr Hueber-Werdmüller au no en anderi Fabrigg go gründe, s erschte Schwiizer Aluminiumwäärch z Nöihuuse, wo au als Afangsoort vo dr öiropäische Aluminiuminduschtry wichtig gsi isch.

Dr Hueber isch z Züri im Gmeindroot gsi und het vil too für die modärni Stadtentwicklig. Er isch im Verwaltigsroot vo dr Schwiizerische Nordoschtbahn gsi.

Literatur

• Martin Illi: Huber, Peter Emil. In: Historisches Lexikon vo dr Schwiiz.
• Hans-Rudolf Schmidt: Emil Huber (-Werdmüller). In: Neue Deutsche Biographie (NDB). Band 9, Duncker & Humblot, Berlin 1972, ISBN 3-428-00190-7, S. 680 f.
• Fritz Rieter: Peter Emil Huber-Werdmüller, 1836–1915, der Gründer der Maschinenfabrik Oerlikon, massgeblicher Mitgründer der Aluminium-Industrie-Aktien-Gesellschaft und weiterer Unternehmungen. (= Schweizer Pioniere der Wirtschaft und Technik. Band 7). Verein für wirtschaftshistorische Studien, Zürich 1957.
• Hans Staffelbach: Peter Emil Huber-Werdmüller 1836–1915, Emil Huber-Stockar (1865–1939): Vater und Sohn. Zwei Lebensbilder als Beitrag zur Geschichte der schweizerischen Technik. Hrsg. von Max Huber-Escher und Hans Hürlimann-Huber. Schulthess, Zürich 1943.
• A. J. P. E. Huber-Werdmüller. In: Schweizerische Bauzeitung. 65/66 (1915), S. 176ff.
• Hundert Jahre Schweizerische Industrie-Gesellschaft. In: Schweizerische Bauzeitung. 65/66 (1953), S. 303–307.