Omurtag

Us der alemannische Wikipedia, der freie Dialäkt-Enzyklopedy
Dr Omurtag in dr Chronik vom Johannes Skylitzes.
S Bulgarische Riich und Öiropa um 814

Dr Omurtag isch vo 814 bis 831 Chan vo de Bulgare gsi.

Lääbe[ändere | Quälltäxt bearbeite]

Im Omurtag si Vater isch dr Bulgarekhan Krum gsi. Wo dr Krum gstorbe isch, häi für e churzi Zit sini Brüeder d Noochfolg übernoo. Noch byzantinische Kwelle häi si Dukumos und Ditzeugos ghäisse.

Woorschiinlig noch 814 isch s zu herte Repressalie gege die christlig-byzantinischi Bevölkerig cho, wo im bulgarische Herrschaftsgebiet gläbt het. Allerdings isch nid klaar, öb die christefindlige Maassnaame vom Omurtag oder vo sim diräkte Vorgänger Ditzeugos usgange si. In de byzantinische Kwelle het s uf jede Fall Bricht, wo verzelle, ass d Christe z Thrakie in dr Fastezit höige müesse entschäide, öb si s Fläischverbot wurde bräche oder umbrocht wärde. 14 Manne si eso Mertüürer worde. Anderi Kwelle brichte vo Massaker an Gfangene.

In mängge Kwelle wird dr Omurtag diräkt für die christefindlige Maassnaame verantwortlig gmacht, aber spööter häi sich d Bezieige zu Byzanz denn doch entspannt. Dr Omurtag het mit em byzantinische Kaiser Leon V. Ändi 815 oder am Aafang vo 816 e Fridensverdraag für drissig Joor abgschlosse. Dr Omurtag het denn dr Kaiser Michael II. im Kampf gegen e Usurpator Thomas understützt.

Dr Omurtag het die bulgarischi Expansioon in Richdig Pannonie und Südweste umgläitet. 824 het er as erste Khan Kontakt zum Frankeriich ufgnoo. 825 het er slawischi Stämm im Donau-Theiss Gebiet zunderworfe und es isch villicht no zu sine Läbzite gsi, ass d Gränze zwüsche de Franke und de Bulgare im ene Verdraag festgläit worde si.

Dr Iifluss wo Byzanz in dere Zit ghaa het, cha mä an dr Archidektuur öbbe vo dr Hauptstadt Pliska gsee uns au griechischi Inschrifte si vo denn erhalten. Dr Ändpunkt vo dere Entwicklig isch d Christianisierig vo Bulgarie e halbs Joorhundert spööter gsi. Gegenüber em Aadel het dr Omurtag e Zentralisierigspolitik bedriibe, wo im groosse Ganze erfolgriich gsi isch.

Dr Noochfolger vom Omurtag isch si jüngst Soon Malamir gsi, wo en unerbittligi anti-christligi Linie verdräte het.

Liddratuur[ändere | Quälltäxt bearbeite]

  • Omurtag. In: Prosopographie der mittelbyzantinischen Zeit: Erste Abteilung (641–867). Nach Vorarbeiten von Ralph-Johannes Lilie, Claudia Ludwig, Thomas Pratsch, Ilse Rochow, Beate Zielke. Bd. 3, Berlin 2000, S. 484–486 (mit Literaturangaben).
  • Veselin I. Beševliev: Die protobulgarische Periode der bulgarischen Geschichte. Amsterdam 1981.
  • Mark Whittow: The Making of Byzantium. Berkeley 1996, S. 278ff.

Weblingg[ändere | Quälltäxt bearbeite]

 Commons: Omurtag – Sammlig vo Multimediadateie
Dä Artikel basiert uff ere fräie Übersetzig vum Artikel „Omurtag“ vu de dütsche Wikipedia. E Liste vu de Autore un Versione isch do z finde.