Dr Olschbärger Hoof z Baasel

Us der alemannische Wikipedia, der freie Dialäkt-Enzyklopedy
(Witergleitet vun Olsperger Hof)

Koordinate: 47° 33′ 18,5″ N, 7° 35′ 37,5″ O; CH1903: 611677 / 267170

Dr Olsbärger Hoof an dr Riddergass 27
Dialäkt: Baseldütsch
S Wabbe über em Iigang

Dr Olschbärger Hoof isch e historischs Geböid an dr Riddergass 27 in dr Groossbaasler Altstadt. Er stoot uf dr Liste vo de Baasler Kulturgüeter.

Gschicht[ändere | Quälltäxt bearbeite]

Dr Olschbärger Hoof het sit 1282 im Chloster Olschbärg ghöört. Im groosse Ärdbeebe vo 1356 isch er stark beschädigt worde.[1]

Wo am Aafang vo der Reformazion d Äbtissin Agnes Haltmeier (1525-1535) us Rhiifälde dr Stadt Baasel dr ganz Chlosterbsitz im Herschaftsberiich vo dr Stadt für 2000 Pfund Stäbler het welle verchaufe, isch s im Erzherzog Ferdinand vo Ööstriich im Joor 1530 glunge, dr Verchauf z verhindere. Die Äbtissin isch bim Chronist schlächt wägchoo. Er verzellt vo iirem Lodderlääbe, wie si mit wältlige und gäistlige Here bis in d Nacht iine gfiirt und sich nid um iiri Pflichde kümmeret häig. Si isch in s reformierte Baasel gflüchdet und het im Olschbärgerhoof gläbt. Es isch ere nid glunge, sich vom Bapst d Freihäite und Briwilegie vom Chloster lo bestätige, und was schliesslig us ere worde isch, wäiss mä nid.[2]

Dr Olschbärger Hoof het vo 1581 aa im Gerold Wachter ghöört und „Zum Leopard“ ghäisse. 1752 het en dr Bandfabrikant Achilles Weiss-Ochs kauft und lo umbaue, woorschinlig vom Archidekt Samuel Werenfels.[1]

1917 het mä under em südlige Däil vom Geböid e Chäller baut, uf em nördlige e dritte Stock drufdoo, s Innere vom erste Stock umbaut und dr Dachstuel us em Middelalter mit eme nöije ersetzt.[1]

Hüte wird e Däil vom Hoof von ere Brivatbank brucht, dr Räscht si Woonige.

Fuessnoote[ändere | Quälltäxt bearbeite]

  1. 1,0 1,1 1,2 Olsberger Hof (Site cha nüme abgrüeft wärde; Suche im Webarchiv)[1] [2] Vorlage:Toter Link/basler-bauten.ch uf basler-bauten.ch, abgrüeft am 21. Januar 2014
  2. Das Olsberger Kloster Hortus Dei - Ein irdisches Paradies ? uf koenigs-media.ch, abgrüeft am 21. Januar 2014