Nikiasfriide

Us der alemannische Wikipedia, der freie Dialäkt-Enzyklopedy

As Nikiasfriide wird dr Friidensverdraag vo 421 v. d. Z. zwüsche Athen und Sparta bezäichnet, wo dr Peloponnesisch Chrieg für e Zit underbroche het. Im überdräite Sinn wird dr Begriff au für e "fuule Friide" brucht.

Wo dr Athener Kleon und dr Spartaner Brasidas in dr Schlacht vo Amfipolis im Joor 422 v. d. Z. gfalle si, häi d Politiker in de bäide Stedt, under iine dr athenisch Politiker und General Nikias und dr spartanisch Köönig Pleistoanax Friidensverhandlige chönne aafoo. Noch em Thukydides isch dr Friide am 9. April 421 v. d. Z. abgschlosse worde.

Er hätt 50 Joor lang sölle duure und het sich am Status quo ante orientiert: Die athenische Stützpünkt Pylos und Kythera hätte gege Amfipolis, wo d Spartaner bsetzt ghaa häi, usduscht wärde. Alli Gfangeni, au d Spartiate wo in dr Schlacht vo Sfakteria gfange gno worde si, hätte sölle usduscht wärde. Skione, wo zu Sparta überdräte isch, het müesse usgliiferet wärde, und anderi thrakischi Stedt häi sölle Abgoobe zaale (phoroi) und drfür in Rue gloo wärde. Theebe het Platää döfe bhalte und Athen e Haafe vo Megara. Und alli häi freije Zuegang zu de panhellenische Häiligdümer ghaa.

Dr Nikiasfriide isch au as „fuule Friide“ bezäichnet worde, wil er d Ursache vom Komflikt nit us dr Wält gschafft het und d Inträsse vo de spartanische Verbündete nit berücksichtigt worde si (Megara het e Haafe verlooer und Korinth nit das überchoo, wo si druf ghofft het). Scho am Aafang het s Händel gee: es isch usgloost worde, ass Sparta müess aafoo, aber die spartanische Drubbe z Amfipolis häi d Stadt nit welle zrugggee, und denn het Athen Pylos bhaltet. Korinth het überhaupt nid zuegstimmt und Theebe und Megara nit in alle Pünkt. D Freiheit wo Sparta sine Verbündete versproche ghaa het, isch e leers Versprache gsi und es het scho bald Unrueje im Peloponnesische Bund gee und nöiji Koalizione si entstande.

Kwelle[ändere | Quälltäxt bearbeite]

  • Thukydides, Geschichte des Peloponnesischen Krieges, 5, 16–24.

Litratuur[ändere | Quälltäxt bearbeite]

  • Donald Kagan: The Peace of Nicias and the Sicilian Expedition. Ithaca, Cornell University Press, London/New York 1981, ISBN 0-8014-1367-2.

Weblingg[ändere | Quälltäxt bearbeite]

  • Jona Lendering: Artikel. In: Livius.org (änglisch)
Dä Artikel basiert uff ere fräie Übersetzig vum Artikel „Nikiasfrieden“ vu de dütsche Wikipedia. E Liste vu de Autore un Versione isch do z finde.