Munzach

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Munzach isch en Oort im Gmeindbann vo dr Stadt Lieschtel im Kanton Basel-Landschaft.

Hüt isch es es Stadtwkartier vo Lieschtel am nordweschtliche Rand vo der Stadtsidlig am Usgang vom Rööseretal.

Früener, im Mittelalter, isch Munzach es chlyses Doorff gsi. Im ene Dokumänt vo anne 825 heisst dr Oort Monciacum. Es het au en eigeti Chile gha, won em Heilige Loränz gweiht gsi isch. Bi dr Pfarrei Munzach sind au d Ortschafte Fränkedoorff und Fülltschrf gsi. S Doorff, wo vilicht im früene Mittelalter vo den Alemanne gründet worden isch und Monzacha gheisse het, het men im drizääte Joorhundert ufgää, wo der Graf vo Frohburg d Stadt Lieschtel het lo boue. D Munzacher sind i die guet gschützti Stadt, wo me dank em Stadträcht e besseri Exischtänz het chönne ha. D Loränzchile isch erscht anne 1765 abbroche worde, der Pfarrer isch scho zwei Joor vorhäär uf Fränkedoorff go woone, scho sit 1618 isch dr Gottesdienscht für die nöi Pfarrei Fränkedoorff-Füllschtrf i dr Chile z Fränkedoorff, wo me dozmol us dr alte chlyne Dorfkapälle e richtigi Chile gmscht het. Der alt Taufschtei us der alte Munzecher Chile stoot hüt i dr refermierte Sankt Margreete-Chile z Fränkedoorff.

Munzach het aber no en vill en elteri Gschicht. Wo me im 1949i d Munzachkwelle nöi gfasst het, sind im Bode alti Muure fürechoo. Es sind d Räschte vom ene grosse römische Landhuus i dr Umgäbig vo dr Stadt Augusta Raurica. Der Lischtler Lehrer Theodor Strübin (1908–1988) het d Muure vo drMunzecher Villa erforscht und vil über die römischi Alaag usegfunde, wo öppis Wichtigs bi de alte Lieschtler Gschichtsmonumänt isch. Der Platz mit de römische Muurfundamänt isch hüt als Stadtpark gstaltet, wo me Teil vo de römische Muure gseht. Es git Lüüt, wo dänke, dr römisch Guetshof chönt au scho Montiacum gheisse ha, und vo däm Name wäär de dr Ortsname Munzach choo.

Dr Zeichner Emanuel Büchel het anne 1751 vo der alte Munzecher Chile no es Bildli gmoolet.

Früener isch im Gebiet vo Munzach, vo der alte Chile häär, au e Fridhof gsi.

1954 isch d Munzachgsellschaft Lieschtel gründet worde, wo für s alte römische Landhuus luegt.

Literatur[ändere | Quälltäxt bearbeite]

  • Jürg Tauber: Munzach In: Historisches Lexikon vo dr Schwiiz.
  • Liestal, Eine neue Heimatkunde, Liestal 2004, S. 436.
  • Reiner Jansen: Munzach-Frenkendorf-Füllinsdorf, Geschichte einer Kirchgemeinde. Liestal 1976.
  • Reiner Jansen: Die Kirche St. Margaretha in Frenkendorf. Füllinsdorf 2005.

Weblink[ändere | Quälltäxt bearbeite]