Meyer zum Pfiil

Us der alemannische Wikipedia, der freie Dialäkt-Enzyklopedy
Gedänkdaafele für e Nikolaus Meyer zum Pfiil und für d Barbara zum Lufft, mit iire bäide Familiewabbe
Dialäkt: Baseldütsch

D Meyer zum Pfiil si vom 15. bis zum 17. Joorhundert e Baasler Patrizierfamilie gsi. E Zwiig vo dr Familie, d Meier vo Büre, häi zum soledurnische Aadel ghöört.

Im spoote Middelalter si d Meyer vilmol Händler und Münzwäggsler gsi und mit em Niclaus, wo Rootsschriiber worde isch, sin si in d Füerigsriige vo dr Stadt ufgnoo worde. Im Niclaus sini Söön, d Bürgermäister Adelbärg (vor 1482 - 1548) und Bernhard (1488 - 1558) häi wääred Joorzäänte d Baasler Politik gläitet und sich as Junker betitlet. Im Adelbärg si Soon, dr Hans Ludwig, isch no Drizääner worde, aber denn isch am Aafang vom 17. Joorhundert e langi Feede zwüschen em Adelbärg sim Änkel, wo au Adelbärt ghäisse het, und de Eckstäis usbroche und dr soziali und politischi Niidergang vo de Meyers het aagfange. Im 17. Joorhundert isch dr Hans Conrad dr letscht Meyer gsi, wo in dr Regierig vo dr Stadt no mitgmischt het. D Familiemitgliider si denn bis in s 19. Joorhundert mäistens Handwärker gsi, e baar von ene Akademiker. D Familie isch am Aafang vom 20. Joorhundert nüme in Baasel aasässig gsi.

Dr Zuenaame zum Pfiil isch vo iirem Familiewabbe cho. Dr Adelbärg und dr Bernhard Meyer häi mit ere Familienchronik aagfange, wo d Blüetezit vo de Meyer zum Pfiil dokumentiert.

Beknnti Familiemitgliider[ändere | Quälltäxt bearbeite]

Litratuur[ändere | Quälltäxt bearbeite]

  • Hans Berner: „Meyer zum Pfeil, Adelberg“, in: Neue Deutsche Biographie 17 (1994), S. 324 ff.
  • A. Bernoulli (Herusgääber): "Die Familienchronik der Meyer zum Pfeil, 1533–1656". In: Basler Chroniken 6 (1902), S. 379–422.
  • Samuel Schüpbach-Guggenbühl: Meyer (BS, zum Pfeil). In: Historisches Lexikon vo dr Schwiiz.