Massimo Ceccaroni

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dialäkt: Baseldütsch

Dr Massimo Ceccaroni (* 15. August 1968 z Basel) isch en ehemolige Schwiizer Profi-Schutter; er het vo 1987 bis 2002 währed siiner ganze professionelle Karriere bim FC Basel gspiilt.[1]

Läbe und Bruef[ändere | Quälltäxt bearbeite]

Dr Ceccaroni isch am 15. August 1968 z Basel uf d Wält cho und am Helvetiablatz im Iseli-Quartier ufgwachse. 1977 her er aagfange, bi de Juniore vom FC Basel z schutte und het in allne Junioreabdeilige mitgmacht, bis er 1987 in die ersti Mannschaft ufgnoo worden isch. Sini grösste Erfolg si 1994 dr Widerufstiig mit em FC Basel in d Nationalliga A und 2002 dr ersti Meistertitel vom Verein sit 22 Johr gsi.

Dr Ceccaroni gältet in siner Heimetstadt Basel as Kultfigur. Einersiits, wil er 25 Johr lang bi sim Stammverein bliiben isch, andrersits, weil er währed siiner ganze Profikarriere in dr oberste Liga nie e Gool gmacht het; au denn nid, won er 2000 in eme Meisterschaftsspiil gege d Grasshoppers Züri e Penalty verschosse und bim Nochschuss druff d Underlatte statt s leere Gool droffe het.

Wo 2002 dr FC Basel si Verdrag nid verlengeret het, het er e Zitli lang bim Amateurverein SC Dornach gspiilt,[2] bis er als Spiilertrainer zum BSC Old Boys Basel gangen isch.[3] Hüte isch er Läiter vom Noochwuggs bim FC Basel.

Si Brueder, dr Stefano Ceccaroni isch au e Fuessballtrainer.

Dr Ceccaroni isch Mitbsitzer vo der ABT Bodenbeläge AG und schafft dört sit über zäh Johr.[4]

Fuessnote[ändere | Quälltäxt bearbeite]

  1. FC Basel 1893 Museum Legände: Massimo Ceccaroni 550 - Seite 10
  2. FC Wangen bei Olten: Wangen-Dornach Matchbericht 1. Mai 2004
  3. SC Dornach: Protokoll der 85. Generalversammlung des SC Dornach - Seite 2
  4. ABT Bodenbeläge AG: Die Geschäftsleitung