Markus Rösler

Dr Markus Rösler (* 22. November 1961 z Gaerlenge) isch e dytsche Landschaftsekolog, Landschaftsekonom un Bolitiker (Bindnis 90/Di Griene. Syt 2011 isch er Abgordnete im Landdag vu Bade-Wirttebärg.

Uusbildig un Beruef

No dr Grundschuel z Gaerlenge isch dr Rösler vu 1972 bis 1981 uf s Gymnasium Korntal gane. Nich em Abitur isch er zwai Johr lang Schutzgebietsbedreier an dr Nordsee (Rantum-Becken Sylt un Norderoog) gsii un ai Johr lang Laiter vum NABU-Umweltzäntrum im Krais Ludisburg, wun er au grindet het. Vu 1985 bis 1992 het er an dr Tächnische Universitet Berlin Landschaftsplanig studiert. In dr Zyt vu sym Studium het er Praxissemeschter z Griecheland gmacht, isch iber e Stipändienufenthalt in dr DDR am Inschtitut fir Landschaftsforschig un Naturschutz z Greifswald gsii un het e Wärchverdrag mit dr Gmai Bad Boll zum Thema Streiobst ghaa, wun er e Diplomarbet grus gmacht het.

Derno het er vu 1993 bis 1997 an dr TU Berlin promoviert zum Thema Arbeitsplätze durch Naturschutz am Beispiel der Biosphärenreservate und der Modellregion Mittlere Schwäbische Alb. Vu 1997 bis 2000 het er am Lehrstuel fir Landschaftsekonomy vu dr Universitet Greifswald gschafft. 2000 bis 2006 isch er Gschäftsfierer vum saarländische NABU gsii, wun er d Stiftig Saarländisches Naturerbe mitgrindet het. Vu 2006 bis 2011 het er im Landdag vu Bade-Wirttebärg im Barlementarische Berotigsdienscht fir d Fraktion vu dr Griene gschafft un isch dert zueständig gsii fir Land- un Forschtwirtschaft, Verbruucherschutz, Natur- un Umwältschutz un Turismus.

Bolitischi Laufbahn

Dr Rösler ghert syter anne 1998 dr Bartei Bindnis 90/Di Grienen aa. Bi dr Landdagswahl z Bade-Wirttebärg 2011 isch er mit 25,5 % fir dr Landdagswahlkrais Vaihenge gwehlt wore. Im Landdag isch er stellverdrättende Vorsitzer vum Uusschuss fir Finanzen un Wirtschaft un Berichterstatter vum Finanz- un Wirtschaftsuusschuss fir dr Huushalt vum Minischterium Ländlige Ruum un Verbruucherschutz un fir d Dänkschrifte vum Landesrächnigshof. Im Uusschuss fir Ländlige Ruum un Verbruucherschutz isch er zueständig fir Naturschutz (u. a. dr Nationalpark im Nordschwarzwald un d Biosphärebiet uf dr Alb un im Sidschwarzwald), Gentächnik un Imkerei, Streiobstböu un Grienland.

In syre Fraktion isch er zueständig fir Noohaltigi Gäldaalage un derzue verdritt er d Fraktion in dr Stiftig Naturschutzfonds un im Landesbyrat fir Naturschutz.

Am 4. Februar 2015 isch er in sym Wahlkrais Vaihenge/Enz fir d Landdagswahl im Merz 2016 nominiert wore.

Ehrenamt un Mitglidschafte

1982 - 1987 Schatzmaischter im Bundesvorstand vu dr DBV-Jugend (hite Naturschutzjugend)
1990 Mitglid vum dytsch-dytsche griene Disch
syt 1992 Sprächer vum NABU-Bundesfachuusschuss Streiobst un Schriftlaiter vum NABU-Streiobstrundbrief.
syt 1994 Verdrätter vum NABU-Bundesverband bi dr Europarc-Federation.
syt 1999 beruefe Mitglid vu dr World Commission on Protected Areas (WCPA) vu dr International Union for the Conservation of Nature (IUCN)
syt 2002 Mitbegrinder un Stiftigsrot vu dr Johannes-Rebmann-Stiftig z Gerlingen.

Mitglidschafte: ADFC, BUND, Europa-Union, Förderverein Bläserklasse Ensingen-Horrheim, Förderverein Grundschule Ensingen, Förderverein Schwäbischer Dialekt, Freunde der Studienstiftung des Deutschen Volkes, Heimatpflegeverein Gerlingen, IUCN-WCPA, NABU, TSV Ensingen (Abt. Tischtennis), VCD

Weblink

Commons: Category: – Album mit Multimediadateie

Dä Artikel basiert uff ere fräie Übersetzig vu dere Version vum Artikel „Markus_Rösler“ vu de dütsche Wikipedia. E Liste vu de Autore un Versione isch do z finde.