Maggebärger
D Maggebärger si es Rittergschlecht im hütige Kanton Fryburg gsi.
Burge
[ändere | Quälltäxt bearbeite]Iri Schtammburg Maggebärg oder au Niidermaggebärg hei si uf em hütige Gebiet vo de Gmeind Tafersch gha, südweschtlich vom hütige Dorf. Im 12. Johhundert hei si sich e zweite Burg laa baue, wo Obermaggebärg gheisse het. Si isch oberhalb vo Alterschwiu gläge, i de Nöchi vom hütige Wiler Obermaggebärg, direkt am Abhang zu Seisegrabe. I de Folg vom Sempacherchrieg im 1387 isch si vo de Bärner zerschtört worde. Hüt si vo dere Burg numme no de Bärgfriid un e Zischterne vorhande.
Familiegschicht
[ändere | Quälltäxt bearbeite]D Maggebärger hei sich sit de Gründig vo de Schtadt Fryburg im 1157 so gnennt u sin Dienschtherr vo de Zähringer, vo de Kyburger u vo de Habsburger gsi. Zwüsche 1250 u 1350 het s Gschlecht sibe Mol de Schutheiss vo de Schtadt Fryburg gschtellt. De bekannteschti Verträter vo de Familie isch de Ulrich II. gsi, wo en Vertrauter vom Rudolf vo Habsburg isch gsi. Vermutlich isch de Ulrich de Erbauer vo de Burg Obermaggebärg gsi. D Familie, wo im 1370i usgschtorbe isch, het sini Grabschtätte im Chloschter Alteryf gha.
Literatur
[ändere | Quälltäxt bearbeite]- Volker Reinhardt (Hrsg.): Handbuch der historischen Stätten. Schweiz und Liechtenstein, Stuttgart 1996.