Ludwig Bär
Dr Ludwig Bär (au Baer, Ber, Berus, Bör) (* 24. Mai 1479 z Baasel; † 14. April 1554 z Freiburg im Brisgau) isch e katholische Theolog und Humanist gsi.
Si Lääbe[ändere | Quälltäxt bearbeite]
Er isch as Soon vom Baasler Kaufmaa Hans Bär em Eltere z Baasel uf d Wält khoo. Äine vo sine Brüeder isch dr Hans gsi, wo 1515 in dr Schlacht vo Marignano gfalle isch.
Dr Ludwig Bär het z Bariis Filosofii und Theologii studiert, het 1511 zum Dr. theol. bromowiert und 1513 e Brofessur an dr Theologische Fakultäät vo dr Uniwersidäät Baasel überchoo. Er isch 1514 und 1528 Dekan vo dr Fakultäät und 1514 und 1520 Räkter vo dr Uni worde. 1513 isch er Chorherr am Kollegiatstift St. Peter worde, 1518 Propst und 1526 Domherr und Scholaster am Münster.
Zerst het er mit dr Reformazion sümpatisiert, isch denn aber zu iirem Gegner worde. Im Mai 1526 isch er äine vo de vier Bresidänte uf dr Baadener Disputazioon gsi.
Wo 1529 z Baasel dr katholisch Gottesdienst verbote worde isch, isch er zämme mit em Erasmus vo Rotterdam, em Heinrich Glarean und meerere Brofässer und Mitgliider vom Domkapitel uf Freiburg im Brisgau züüglet, won er an dr Uniwersidäät e Leeramt überchoo het und im Erasmus si Sekretäär gsi isch. 1533 het er zwüschen em Erasmus und em Ambrosius Pelargus vermiddlet. 1534 het er dr Nicolas Cop droffe. Dr Buechdrucker Johannes Oporinus, won e Nöwöö vo dr Site vo dr Mueter gsi isch, het en gergeret und er het en enterbt.[1]
Wärk[ändere | Quälltäxt bearbeite]
- Pro salutari hominis ad felicem mortem praeparatione. Baasel 1549 Digitalisat
- Ad quaestionem ei propositam Utrum videlicet tempore pestis. Baasel 1551. Digitalisat
Litratuur[ändere | Quälltäxt bearbeite]
- Adolf Brecher: Bär, Ludwig. In: Allgemeine Deutsche Biographie (ADB). Band 2, Duncker & Humblot, Leipzig 1875, S. 45 f.
- Winfried Trusen: Baer (Ber, Berus), Ludwig. In: Neue Deutsche Biographie (NDB). Band 1, Duncker & Humblot, Berlin 1953, ISBN 3-428-00182-6, S. 525.
- Friedrich Wilhelm Bautz: Baer (Ber, Berus), Ludwig. In: Biographisch-Bibliographisches Kirchenlexikon (BBKL). Band 1, Hamm 1975, Sp. 340.
Weblingg[ändere | Quälltäxt bearbeite]
- Mario Sabatino: Bär, Ludwig. In: Historisches Lexikon vo dr Schwiiz.
Fuessnoote[ändere | Quälltäxt bearbeite]
- ↑ http://www.ub.unibas.ch/kadmos/gg/?http://www.ub.unibas.ch/kadmos/gg/hi/higg0474.htm (Site cha nüme abgrüeft wärde; Suche im Webarchiv)
|
Dä Artikel basiert uff ere fräie Übersetzig vu dere Version vum Artikel „Ludwig_Bär_(Theologe)“ vu de dütsche Wikipedia. E Liste vu de Autore un Versione isch do z finde. |