Lisa Brühlmann

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

D Lisa Ivana Brühlmann (* 1981 z Züri) isch e Schwyzer Schauspiileri un Reschiseeri.

Lääbe[ändere | Quälltäxt bearbeite]

D Brühlmann isch z Züri im Krais 3 as Doochter vun ere ellaierziehende Mueter ufgwagse. Scho mit vier het si bim Chindertheater Metzenthin d Biini entdeckt. Si het s KV gmacht. Derno het si vu 2005 bis 2008 Schauspiil an dr Schauspiilschuel Charlottenburg z Berlin studiert un vu 2010 bis 2016 Filmreschy an dr ZHdK z Züri.

Si het in dr Stuck Parasiten un Das Quartett an dr Theaterwärchstatt Charlottenburg un in vyl Film un Fäärnseeserie gspiilt.[1] Anne 2009 isch si zum eerschte Mool hinter dr Kamera gstande un het dr Chuurzfilm Frühlingserwachen draait.[2] Syter anne 2008 schafft si nääbeberuefli as Theaterpedagoogi. Anne 2016 het si ire eerscht Langspiilfilm unter em Titel Blue My Mind draait. Dää isch am Filmfestival San Sebastián un am Zurich Film Festival zaigt woore. Am Züri Film Feschtival het er dr eerscht Bryys in dr Kategory "Fokus Schwyz, Dytschland, Eeschtryych" gwunne, dr Kritikerbryys vu dr Schwyzer Filmschurnalischte fir dr bescht Erschtlig un dr Filmbryys vu dr Zürcher Chilche.[3] Dr Film isch in siibe Kategorie fir dr Schwyzer Filmbryys nominiert woore. As eerschte Film isch der dooderbyy in e jeedere Kategory nominiert woore, wu s git.[4] Uuszaichnet woore isch er schließli in drei Kategorie (Beschte Film, bescht Draaibuech un beschti Hauptdaarstelleri).

Fir iri Inszenierig vu dr Folg Desperate Times us dr Fäärnseeserie Killing Eve isch si 2019 fir e Primetime Emmy in dr Kategory Reschy fir e Dramaserie nominiert woore.[5]

D Lisa Brühlmann isch ghyroote mit em Reschiseer Dominik Locher. Si hän zäme ne Suun. Un lääbe z Züri Oberstrass.

Filmografy[ändere | Quälltäxt bearbeite]

As Schauspiileri (Uuswahl)[ändere | Quälltäxt bearbeite]

  • 2006: Heinrich VIII – Mörder auf dem Königsthron
  • 2008: Tatort – Unbestechlich
  • 2008: Tag und Nacht
  • 2009: Frühling im Herbst
  • 2010: SOKO Leipzig – Girls, Girls, Girls
  • 2010: Der Landarzt – Hochzeitspläne
  • 2010: Der Mann mit dem Fagott
  • 2011: Alarm für Cobra 11 – En Vogue
  • 2011: Der Kriminalist – Unter Druck
  • 2011: SOKO Leipzig – Gefangen
  • 2012: Das Missen Massaker
  • 2013: Bella und der Feigenbaum
  • 2013: Tempo Girl
  • 2017: Goliath

As Reschiseeri[ändere | Quälltäxt bearbeite]

  • 2010: Frühlingserwachen (Chuurzfilm)
  • 2010: Flügge (Chuurzfilm)
  • 2012: Irgendwie (Chuurzfilm)
  • 2013: Hylas und die Nymphen (Chuurzfilm)
  • 2015: Mäge (Chuurzfilm)
  • 2016: Peripherie (Episodefilm; ai Episod)
  • 2017: Blue My Mind (Film)
  • 2019: Killing Eve (Fäärnseeserie, zwoo Folge)

Weblink[ändere | Quälltäxt bearbeite]

Fueßnote[ändere | Quälltäxt bearbeite]

  1. Lisa Ivana Brühlmann in Tag und Nacht
  2. Frühlingserwachen bei Goldbadger.ch (Memento vom 1. März 2010 im Internet Archive)
  3. Zurich Film Festival. Abgruefen am 16. Oktober 2017.
  4. Pubertätsdrama «Blue My Mind» gelingt Nominations-Rekord. In: az Aargauer Zeitung. 31. Januar 2018 (aargauerzeitung.ch [abgerufen am 21. Februar 2018]).
  5. Academy of Television Arts & Sciences: 71st Emmy Awards Nominations Documents. 16. Juli 2019, abgruefen am 16. Juli 2019 (änglisch).