Kräis 48

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Baseldütsch

Dr Kräis 48 isch e Baasler Künstlergrubbe gsi, wo sich im Joor 1948 uf d Iniziative vom Max Kämpf bildet het.

D Grubbe isch entstande under anderem für zum gmäinsami Usstellige z organisiere und zum iiri Inträsse z verdrätte, zum Bischbil im Baasler Kunstkredit, won e staatligi Instiduzioon isch. Si het sich am 3. Mai 1950 as Veräin mit Statute konstituiert. Die erste gmäinsame Usstellige häi 1948 in dr Galerii Bezeler und 1950 in dr Baasler Kunsthalle stattgfunde. Die erste Bresidänte si dr Dr. Frank Weiss (bis 1953), 1953-65 dr Brofässer Alfred Bühler, ab 1965 dr Dr. Hans Ruedi Oeri gsi.

Dr Kräis 48 het sich as Reakzioon vo jüngere Mooler und Bildhauer uf d Grubbe 33 bildet, wo Künstlerorganisazioon gsi isch, wo denn z Baasel dominiert het, und uf d GSMBA (Gsellschaft vo schwizerische Mooler, Bildhauer und Archidekte). Im Kräis 48 si d Baasler Graumooler stark verdrätte gsi.

Künstlerisch aktivi Mitgliider si dr Heinrich Barth, dr Jean-François Comment, dr Romolo Esposito, dr Karl Glatt, dr Max Kämpf, dr Theo Lauritzen, dr Alex Maier, dr Peter Moilliet, dr Toni Rebholz, d Julie Schätzle, dr Gustav Stettler, dr Paul Stöckli und dr Hans Weidmann gsi. Spööter si d Valery Heussler, d Hanni Salathé und dr Robert Lienhard drzue cho. Dr Lauritzen, dr Lienhard, dr Moilliet und d Salathé si Bildhauer gsi, alli andere Mooler.

Kwelle[ändere | Quälltäxt bearbeite]

  • "Die Basler Künstlergruppe Kreis 48". Uuusegee vom M. Gass, M. Glatt und A. Jetzer, Baasel 2016. ISBN 978-3-85616-810-0
  • Monika Barino, in: Poesie, Zeitschrift für Literatur. Heft 3, 1982 (ISSN 0378-0643).
  • Hans Weidmann, in: Künstler des Kreises 48. Schweizerische Kreditanstalt Basel, 1984.

Weblingg[ändere | Quälltäxt bearbeite]

Information icon.svg Dä Artikel basiert uff ere fräie Übersetzig vum Artikel „Kreis 48“ vu de dütsche Wikipedia. E Liste vu de Autore un Versione isch 48&action=history do z finde.