Konzil von Basel/Ferrara/Florenz

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dialäkt: Baseldütsch
Zwäisproochigi Unionsbulle vo 1439 mit dr Underschrift und dr Goldbulle vom byzantinische Kaiser

S Konzil vo Basel-Ferrara-Floränz isch s 17. Konzil vo dr römisch-katholische Chille. Dr Babst Martin V. het s iiberüeft. Es het 1431 z Basel aagfange und isch 1445 z Rom z Änd gange.

D Konzilsväter, wo z Baasel versammlet gsi si, häi sich aber bald en äignigs Statut gee und en äignigi Daagesordnig, wo iiri Vorstellig ufzäigt häi, ass s Konzil dr Vorrang vor em Bapst häig, e Posizion wo män ere Konziliarismus säit. Wo dr Bapst Eugen IV. s Konzil am 18. Dezämber 1431 für ufglöst erklärt het, het das äifach witergmacht.

Offiziell het s Konzil in drei Stedt stattgfunde: Basel, Ferrara und Floränz. Am 30. Dezämber 1438, noch em Dood vom Kaiser Sigismund, wo s Basler Konzil understützt het, het dr Babst Eugen IV. en äignigs Konzil uf Ferrara iiberüeft. S Konzil z Basel isch aber no witer gloffe, und dorum wird in dr Forschig s Konzil as zwäi Versammlige aagluegt, wo vonenander unabhängig si - uf dr äinte Site Basel, uf dr andere Ferrara-Floränz.