Chleigebiet

E Chleigebiet (uff Ungarisch kistérség [ˈkiʃˌteːrseːg]) isch z Ungarn e Gebiet, wo uss mehrere Gmeinde bstoht und vor allem de Entwicklig und de Statistik dient. Zwar entspräche d'Chleigebiet vo de Größi her in etwa de friehnere ungarische Bezirk, mer cha si aber nit als Nochfolger vo sälle bezeichne, wyl nit vo de Verwaltig vo de Komitat bstimmt wird, was zu wellem Chleigebiet ghört.

E Chleigebiet umfasst immer di ganzi Flächi vo allne Gmeinde, wo dezüeghöre; e Gmeind cha numme zu einem Komitat ghöre. Es git keini Gmeinde, wo nit Bstanddeil vo me Chleigebiet sin. Me Chleigebiet chönne usserdem numme Gmeinde vo einem Komitat züegordnet sy.

Momentan git's z Ungarn 174 Chleigebiet.

Gschicht

D'Vorgschicht

1994 hät de Bräsidänt vom Statistikamt KSH (Központi Statisztikai Hivatal) mitdeilt, dass er für statistischi Zwäck neui Bezirke ygfiehrt gha hät. In säller Mitdeilig isch vo 138 Bezirk d'Red, ab em 1. Januar 1998 vo 150.

E Erlass vo de Regierig uss em Johr 2003 hät zu sälle 150 Chleigebiet neui züegfiegt und bis zum Septämber 2007 isch d'Azahl uff 168 gstyge. S Parlamänt hät spöter sechs neui Chleigebiet züegfiegt.

I me witere Erlass vo 2004 hät d'Regierig Organisatione in s Läbe grüefe, wo jewyls innerhalb vo einem Chleigebiet e Deil vo de Uffgabe vo de Gmeinde ihrer Selbschtverwaltig erfülle und zu de Entwicklig vom Gebiet bydrage.

Gsellschafte vo de Selbstverwaltige

Lut me Gsetz über d'Entwicklig vo de Gmeinde uss em Johr 1996 dürfe d'Verwaltige vo de einzelne Gmeinde Gsellschafte uffstelle, wo sich um d'Entwicklig, d. h. um s Erstelle vo Entwickligsbrogramm und sälle ihri Verwirkligung kümmere. Sit 2004 besait säll Gsetz usserdem, dass s staatlig Közigazgatási Hivatal (Verwaltigsbüro) in Gmeinde, wo kei sonigi Gsellschaft zstand cho isch, e sognännte Kistérségi Fejlesztési Tanács (Entwickligsroot vom Chleigebiet) uffstelle müeß, wo sich um di entsprächende Uffgabe kümmert.

Am 30. Abril 2005 hät's in 12 Chleigebiet Entwickligsgsellschaft gee.

D'Bildig vo neue Chleigebiet

Sit's s Chleigebiet-System git, sin mehreri Mol neui Chleigebiet durch d'Uffdeilig vo alte entstande. Zletscht sin am 26. Septämber 2007 neui Chleigebiet entstande, wo d'Zahl vo 168 uff 174 gstyge isch.

Lüeg au

Dä Artikel basiert uff ere fräie Übersetzig vum Artikel „Kistérség“ vu de ungarische Wikipedia. E Liste vu de Autore un Versione isch do z finde.